വാഷിംഗ്ടൺ: ഇറാനെതിരെ സംയുക്ത സൈനിക നീക്കത്തിന് അമേരിക്കയും ഇസ്രായേലും തയ്യാറെടുക്കുന്നതായി റിപ്പോർട്ട്. ഇറാന്റെ ആണവ കേന്ദ്രങ്ങളെ ലക്ഷ്യം വെച്ചുള്ള ആക്രമണത്തിനാണ് ഇരുരാജ്യങ്ങളും പദ്ധതിയിടുന്നതെന്ന് അന്താരാഷ്ട്ര മാധ്യമങ്ങളെ ഉദ്ധരിച്ചുള്ള റിപ്പോർട്ടുകൾ വ്യക്തമാക്കുന്നു.
ഇറാനെതിരായ ആക്രമണം ലക്ഷ്യമിട്ട് അമേരിക്കയും ഇസ്രായേലും ഉടൻ തന്നെ സംയുക്ത സൈനികാഭ്യാസം നടത്താൻ സാധ്യതയുണ്ട്. ഇറാന്റെ ആണവ പദ്ധതികൾ തടയുക എന്ന ലക്ഷ്യത്തോടെയാണിത്.
ഇത്തരമൊരു സൈനിക നീക്കം ഉണ്ടായാൽ അത് പശ്ചിമേഷ്യയിൽ വലിയ യുദ്ധത്തിന് വഴിമാറുമെന്നും ആഗോള എണ്ണ വിപണിയെയും സാമ്പത്തിക വ്യവസ്ഥയെയും ഗുരുതരമായി ബാധിക്കുമെന്നും വിദഗ്ധർ മുന്നറിയിപ്പ് നൽകുന്നു.
നിലവിൽ നയതന്ത്ര ചർച്ചകൾക്ക് പ്രാധാന്യം നൽകുന്നുണ്ടെങ്കിലും, അവ പരാജയപ്പെട്ടാൽ സൈനിക നീക്കം തന്നെയാകും അടുത്ത ഘട്ടമെന്ന സൂചനയാണ് ഈ റിപ്പോർട്ടുകൾ നൽകുന്നത്. ലോകരാജ്യങ്ങൾ അതീവ ജാഗ്രതയോടെയാണ് ഈ നീക്കങ്ങളെ ഉറ്റുനോക്കുന്നത്.
