യുഎഇ: അമേരിക്ക-ഇസ്രായേൽ സഖ്യവും ഇറാനും തമ്മിലുള്ള സംഘർഷം രൂക്ഷമായതിനെത്തുടർന്ന് ഹോർമുസ് കടലിടുക്കിന് സമീപം ഇന്ത്യൻ എൽപിജി കപ്പൽ കുടുങ്ങിക്കിടക്കുകയാണെന്ന് റിപ്പോർട്ട്. ക്യാപ്റ്റൻ വീരേന്ദ്ര വിശ്വകർമയുടെ നേതൃത്വത്തിലുള്ള ഈ കൂറ്റൻ ടാങ്കറിൽ 36 ലക്ഷം ഗാർഹിക സിലിണ്ടറുകൾക്ക് ആവശ്യമായ പാചകവാതകമാണുള്ളത്.
കുവൈറ്റിലെ മിന അൽ അഹമ്മദിയിൽ നിന്ന് ഗുജറാത്തിലെ ദീൻദയാൽ കണ്ട്ല തുറമുഖത്തേക്ക് പുറപ്പെട്ട കപ്പലാണിത്. ഫെബ്രുവരി 28 മുതൽ സമുദ്രപാതയിൽ ഏർപ്പെടുത്തിയ നിയന്ത്രണങ്ങളെത്തുടർന്നാണ് കപ്പലിന് യാത്ര തുടരാൻ കഴിയാത്തത്. നിലവിൽ യുഎഇക്ക് സമീപമുള്ള മിന സഖർ തുറമുഖ മേഖലയിൽ കപ്പൽ നങ്കൂരമിട്ടിരിക്കുകയാണ്.
കപ്പലിലെ 34 ജീവനക്കാരും കടുത്ത ഭീതിയിലാണ്. കപ്പലിന് മുകളിലൂടെ മിസൈലുകളും ഡ്രോണുകളും നിരന്തരം പറക്കുന്നതായും എല്ലായിടത്തും സൈറൺ മുഴങ്ങുന്നതായും ക്യാപ്റ്റൻ അറിയിച്ചു. ഏതു നിമിഷവും എന്തും സംഭവിക്കാവുന്ന സാഹചര്യമാണുള്ളത്. കപ്പലിൽ 60 ദിവസത്തേക്ക് ആവശ്യമായ അവശ്യസാധനങ്ങൾ മാത്രമേയുള്ളൂ. കൂടാതെ, ഇന്റർനെറ്റ് ഇല്ലാത്തതിനാൽ നാട്ടിലെ കുടുംബാംഗങ്ങളുമായി ആശയവിനിമയം നടത്താനും ജീവനക്കാർക്ക് സാധിക്കുന്നില്ല. ഇന്ത്യൻ നാവികസേനയുടെ സുരക്ഷാ അകമ്പടി ലഭിച്ചാൽ മാത്രമേ സുരക്ഷിതമായി മടങ്ങാൻ കഴിയൂ എന്ന് ക്യാപ്റ്റൻ വിശ്വകർമ സന്ദേശത്തിലൂടെ വ്യക്തമാക്കി.
