ഇസ്ലാമാബാദ്: പാകിസ്ഥാനിൽ വെച്ച് നടന്ന നിർണ്ണായകമായ യുഎസ്-ഇറാൻ സമാധാന ചർച്ചകൾ പരാജയപ്പെട്ടതായി അമേരിക്കൻ വൈസ് പ്രസിഡന്റ് ജെ.ഡി വാൻസ് അറിയിച്ചു. ഏകദേശം 21 മണിക്കൂർ നീണ്ടുനിന്ന മാരത്തൺ ചർച്ചകൾക്കൊടുവിലും ഒരു പൊതുവായ ഉടമ്പടിയിലെത്താൻ ഇരുരാജ്യങ്ങൾക്കും സാധിച്ചില്ല. ഈ പരാജയം അമേരിക്കയേക്കാൾ കൂടുതൽ ദോഷകരമായി ബാധിക്കുക ഇറാനെയായിരിക്കുമെന്നും അദ്ദേഹം മുന്നറിയിപ്പ് നൽകി.ഇറാൻ ദീർഘകാലത്തേക്ക് ആയുധ നിർമ്മാണ മേഖലയിൽ നിന്ന്, പ്രത്യേകിച്ച് ആണവായുധങ്ങൾ നിർമ്മിക്കുന്നതിൽ നിന്ന് വിട്ടുനിൽക്കുമെന്ന ഉറപ്പാണ് അമേരിക്ക പ്രധാനമായും ആവശ്യപ്പെട്ടത്. എന്നാൽ അമേരിക്ക മുന്നോട്ടുവെച്ച കർശനമായ നിബന്ധനകൾ അംഗീകരിക്കാൻ ഇറാൻ തയ്യാറായില്ല. തങ്ങളുടെ നിലപാടുകൾ കൃത്യമായി ഇറാനെ അറിയിച്ചിട്ടുണ്ടെന്നും വിട്ടുവീഴ്ചകൾക്ക് അമേരിക്ക തയ്യാറല്ലെന്നും വാൻസ് വ്യക്തമാക്കി.ചർച്ചകൾക്കിടെ ജെ.ഡി വാൻസ് നിരവധി തവണ പ്രസിഡന്റ് ഡൊണാൾഡ് ട്രംപുമായി ഫോണിൽ സംസാരിച്ചതായും വാർത്തകൾ പുറത്തുവരുന്നുണ്ട്. സമാധാന ഉടമ്പടിക്ക് ഇറാൻ തയ്യാറാകാത്ത സാഹചര്യത്തിൽ മേഖലയിലെ അനിശ്ചിതത്വം തുടരുമെന്നാണ് വിലയിരുത്തപ്പെടുന്നത്.
യുഎസ്-ഇറാൻ സമാധാന ചർച്ചകൾ പരാജയപ്പെട്ടു; ഇറാന്റെ കടുംപിടുത്തം തിരിച്ചടിയായെന്ന് ജെ.ഡി വാൻസ്
