പെർത്ത്: മിഡിൽ ഈസ്റ്റിലെ യുദ്ധത്തെത്തുടർന്ന് രാജ്യം കടുത്ത ഇന്ധന പ്രതിസന്ധി നേരിടുന്ന സാഹചര്യത്തിൽ, സ്വന്തമായി ഇന്ധന ശേഖരം (Fuel Reserve) നിർമ്മിക്കുന്ന കാര്യം ആലോചിച്ച് പടിഞ്ഞാറൻ ഓസ്ട്രേലിയൻ (WA) സർക്കാർ. മറ്റ് സംസ്ഥാനങ്ങളുമായി പങ്കുവെക്കാതെ, പടിഞ്ഞാറൻ ഓസ്ട്രേലിയക്കാർക്ക് മാത്രമായി ഉപയോഗിക്കാവുന്ന പ്രത്യേക ശേഖരമാണ് സർക്കാർ ലക്ഷ്യമിടുന്നത്.
മിഡിൽ ഈസ്റ്റിലെ സംഘർഷങ്ങളെത്തുടർന്ന് ഹോർമുസ് കടലിടുക്ക് വഴിയുള്ള എണ്ണ നീക്കം ഇറാൻ തടസ്സപ്പെടുത്തിയതാണ് നിലവിലെ പ്രതിസന്ധിക്ക് കാരണം. ഈ സാഹചര്യത്തിൽ സംസ്ഥാനത്തെ ഊർജ്ജ സുരക്ഷയും വിതരണ ശൃംഖലയും ഉറപ്പുവരുത്തുന്നതിനാണ് പുതിയ പദ്ധതിയെന്ന് ഊർജ്ജ മന്ത്രി ആംബർ-ജേഡ് സാൻഡേഴ്സൺ ഞായറാഴ്ച അറിയിച്ചു. സർക്കാർ നേരിട്ട് ഡീസൽ വാങ്ങി സംഭരിക്കുകയും വിതരണം തടസ്സപ്പെടുന്ന ഘട്ടങ്ങളിൽ ഇത് ഉപയോഗിക്കുകയും ചെയ്യും.
കാർഷിക മേഖലകൾ, ഖനന പ്രവർത്തനങ്ങൾ, വൈദ്യുതിക്കായി ഡീസൽ ജനറേറ്ററുകളെ ആശ്രയിക്കുന്ന ഉൾനാടൻ ഗ്രാമങ്ങൾ എന്നിവിടങ്ങളിലേക്കായിരിക്കും മുൻഗണന നൽകുക. ദശലക്ഷക്കണക്കിന് ലിറ്റർ ഇന്ധനം സംഭരിക്കാനാണ് നീക്കമെങ്കിലും ഇതിന്റെ ആകെ ചിലവ് സർക്കാർ വെളിപ്പെടുത്തിയിട്ടില്ല. നിലവിലുള്ള ദേശീയ ഇന്ധന ശേഖരത്തിന് പുറമെയായിരിക്കും സംസ്ഥാനത്തിന്റെ ഈ പുതിയ കരുതൽ ശേഖരം. ദേശീയ ശേഖരത്തിലുള്ള തങ്ങളുടെ വിഹിതം തുടർന്നും ലഭിക്കുമെന്ന് ഉറപ്പാണെന്നും മന്ത്രി വ്യക്തമാക്കി.
നിലവിലെ ഇന്ധന പ്രതിസന്ധി ഉണ്ടായപ്പോൾ, പ്രമുഖ ഇന്ധന വിതരണക്കാരായ വിവ (Viva), ആംപോൾ (Ampol) തുടങ്ങിയവർ പടിഞ്ഞാറൻ ഓസ്ട്രേലിയയിൽ ഇന്ധനം സംഭരിക്കാതെ ക്വീൻസ്ലൻഡ് പോലുള്ള മറ്റ് സംസ്ഥാനങ്ങളിലാണ് സൂക്ഷിച്ചിരുന്നത് എന്ന് കണ്ടെത്തിയിരുന്നു. ഇത് സംസ്ഥാനത്തെ പ്രതിസന്ധി രൂക്ഷമാക്കി. ഈ പശ്ചാത്തലത്തിലാണ് സ്വന്തം നിലയ്ക്ക് ശേഖരം വേണമെന്ന ആവശ്യം ശക്തമായത്.
സർക്കാരിന്റെ ഈ നീക്കത്തെ പ്രതിപക്ഷ നേതാവ് ബേസിൽ സെമ്പിലാസ് സ്വാഗതം ചെയ്തുവെങ്കിലും പദ്ധതിയുടെ കൂടുതൽ വിശദാംശങ്ങൾ വ്യക്തമാക്കണമെന്ന് ആവശ്യപ്പെട്ടു. ഭാവിയിൽ ഇത്തരം ആഗോള പ്രതിസന്ധികൾ ഉണ്ടാകുമ്പോൾ പടിഞ്ഞാറൻ ഓസ്ട്രേലിയൻ വ്യവസായ മേഖല തകരാതിരിക്കാൻ സ്വന്തം നിലയിലുള്ള കരുതൽ ശേഖരം അനിവാര്യമാണെന്ന് അദ്ദേഹം പറഞ്ഞു.
