മിലാൻ: കായിക ലോകം കാത്തിരുന്ന 25-ാമത് ശൈത്യകാല ഒളിമ്പിക്സിന് ഇറ്റലിയിലെ മിലാനിൽ ഉജ്ജ്വല തുടക്കം. നഗരത്തിലെ വിഖ്യാതമായ സാൻ സിറോ സ്റ്റേഡിയത്തിൽ നടന്ന കണ്ണഞ്ചിപ്പിക്കുന്ന ഉദ്ഘാടന ചടങ്ങുകളോടെയാണ് രണ്ടാഴ്ച നീണ്ടുനിൽക്കുന്ന കായിക മാമാങ്കത്തിന് ഔദ്യോഗികമായി തിരശ്ശീല ഉയർന്നത്. ഇറ്റാലിയൻ പ്രസിഡന്റ് സെർജിയോ മാറ്ററെല്ല ഗെയിംസ് ഉദ്ഘാടനം ചെയ്തു.
‘ഹാർമണി’ (Armonia) എന്ന പ്രമേയത്തിൽ അവതരിപ്പിക്കപ്പെട്ട ഉദ്ഘാടന ചടങ്ങുകൾ ഇറ്റലിയുടെ സമ്പന്നമായ സാംസ്കാരിക പൈതൃകവും ആധുനിക സാങ്കേതികവിദ്യയും സമന്വയിപ്പിച്ച ഒന്നായിരുന്നു. ലോകപ്രശസ്ത ഗായകൻ ആൻഡ്രിയ ബോസെല്ലി, പോപ്പ് താരം മരിയ കെറി എന്നിവരുടെ പ്രകടനങ്ങൾ ചടങ്ങിന് മാറ്റുകൂട്ടി. ചരിത്രത്തിലാദ്യമായി രണ്ട് വ്യത്യസ്ത നഗരങ്ങളിൽ (മിലാൻ, കോർട്ടിന) ഒരേസമയം ഒളിമ്പിക് ദീപശിഖ തെളിയിച്ചു എന്ന പ്രത്യേകതയും ഈ വർഷത്തെ ഉദ്ഘാടനത്തിനുണ്ട്.
വിവിധ രാജ്യങ്ങളിൽ നിന്നുള്ള രണ്ടായിരത്തഞ്ഞൂറിലധികം കായികതാരങ്ങൾ മാർച്ച് പാസ്റ്റിൽ അണിനിരന്നു. ഇന്ത്യയെ പ്രതിനിധീകരിച്ച് ആൽപൈൻ സ്കീയിംഗിൽ ആരിഫ് ഖാനും ക്രോസ് കൺട്രി സ്കീയിംഗിൽ സ്റ്റാൻസിൻ ലുണ്ടപ്പും ഈ വിന്റർ ഒളിമ്പിക്സിൽ പങ്കെടുക്കുന്നുണ്ട്. മിലാൻ, കോർട്ടിന ഡി ആമ്പെസ്സോ എന്നിവിടങ്ങളിലായി 16 വിഭാഗങ്ങളിലായി 116 മത്സരങ്ങളാണ് നടക്കുക. ഫെബ്രുവരി 22 വരെ നീണ്ടുനിൽക്കുന്ന ഈ കായിക ഉത്സവത്തിൽ ലോകമെമ്പാടുമുള്ള കായിക പ്രേമികളുടെ കണ്ണുകൾ ഇനി ഇറ്റലിയിലേക്കായിരിക്കും.
