മെൽബൺ: ഓസ്‌ട്രേലിയൻ സംസ്ഥാനമായ വിക്ടോറിയയിലെ പൊതുജനാരോഗ്യ മേഖലയിലെ തൊഴിൽതർക്കം വീണ്ടും രൂക്ഷമാകുന്നു. തൊഴിൽ സാഹചര്യങ്ങളും കരാർ വ്യവസ്ഥകളും മെച്ചപ്പെടുത്തണമെന്ന് ആവശ്യപ്പെട്ട് സർക്കാർ ആശുപത്രികളിലെ ഡോക്ടർമാർ ഒക്ടോബർ 21 ബുധനാഴ്ച 12 മണിക്കൂർ പണിമുടക്ക് പ്രഖ്യാപിച്ചു. രാവിലെ 7:00 മണി മുതൽ വൈകുന്നേരം 7:00 മണി വരെയാണ് ജോലി നിർത്തിവെക്കൽ സമരം. അന്നേദിവസം ഉച്ചയ്ക്ക് 1:30-ന് വിക്ടോറിയൻ പാർലമെന്റ് മന്ദിരത്തിന് മുന്നിൽ ഡോക്ടർമാരുടെ വൻ പ്രതിഷേധ റാലിയും നടക്കും.
ഓസ്‌ട്രേലിയൻ മെഡിക്കൽ അസോസിയേഷനും ഓസ്‌ട്രേലിയൻ സാലറീഡ് മെഡിക്കൽ ഓഫീസേഴ്സ് ഫെഡറേഷനും സംയുക്തമായാണ് പണിമുടക്കിന് ആഹ്വാനം നൽകിയത്. കഴിഞ്ഞ ഒന്നര വർഷത്തോളമായി സർക്കാരുമായി എന്റർപ്രൈസ് ബാർഗൈനിംഗ് ചർച്ചകൾ നടക്കുന്നുണ്ടെങ്കിലും അടുത്തിടെ സർക്കാർ മുന്നോട്ടുവെച്ച ഇടക്കാല നിർദ്ദേശം സംഘടനാംഗങ്ങൾ വോട്ടിനിട്ട് തള്ളുകയായിരുന്നു. യൂണിയനിലെ 10,500-ഓളം അംഗങ്ങളിൽ വോട്ടെടുപ്പിൽ പങ്കെടുത്ത 89 ശതമാനം ഡോക്ടർമാരും സർക്കാർ നിർദ്ദേശത്തിനെതിരെ വോട്ട് ചെയ്തു. ജീവനക്കാരുടെ കുറവ്, കടുത്ത ജോലിഭാരം, ദീർഘനേരത്തെ ഷിഫ്റ്റുകൾ എന്നിവ പരിഹരിക്കാൻ വ്യക്തമായ നടപടികൾ വേണമെന്നാണ് ഇവരുടെ പ്രധാന ആവശ്യം. നേരത്തെ ഒക്ടോബർ ഒന്നിന് നാല് മണിക്കൂർ സൂചനാ പണിമുടക്കും നടന്നിരുന്നു.
അതേസമയം, പണിമുടക്ക് ദിവസത്തിലും ആശുപത്രികളിലെ എമർജൻസി ഡിപ്പാർട്ട്‌മെന്റുകളെയും ഇന്റൻസീവ് കെയർ യൂണിറ്റുകളെയും സമരത്തിൽ നിന്ന് പൂർണ്ണമായും ഒഴിവാക്കിയിട്ടുണ്ട്. രോഗികളുടെ സുരക്ഷ കണക്കിലെടുത്ത് സാധാരണ ശനിയാഴ്ചകളിലെ സ്റ്റാഫിംഗിന് തുല്യമായ ജീവനക്കാർ അത്യാഹിത വിഭാഗങ്ങളിൽ ഡ്യൂട്ടിയിലുണ്ടാകും. എന്നാൽ ഒപി വിഭാഗങ്ങൾ, അടിയന്തരമല്ലാത്ത പരിശോധനകൾ, മുൻകൂട്ടി നിശ്ചയിച്ച ശസ്ത്രക്രിയകൾ എന്നിവയുടെ പ്രവർത്തനത്തിൽ തടസ്സവും കാലതാമസവും നേരിടാൻ സാധ്യതയുണ്ട്.
ആശുപത്രികളിലെ രോഗീപരിചരണത്തിനാണ് മുഖ്യ പരിഗണനയെന്നും തടസ്സങ്ങൾ ഒഴിവാക്കാൻ ആരോഗ്യവകുപ്പ് നടപടികൾ സ്വീകരിക്കുന്നുണ്ടെന്നും ആരോഗ്യ മന്ത്രി ഇൻഗ്രിഡ് സ്റ്റിറ്റ് അറിയിച്ചു. വരുംദിവസങ്ങളിൽ പ്രശ്നപരിഹാരത്തിനായി കൂടുതൽ ചർച്ചകൾ നടന്നേക്കും.
