സൂറിച്ച്: 2030 ഫിഫ ലോകകപ്പിൽ ടീമുകളുടെ എണ്ണം 48ൽനിന്ന് 64 ആയി ഉയർത്തുന്നതിനെക്കുറിച്ച് ആലോചിക്കുമെന്ന് ഫിഫ പ്രസിഡന്റ് ജിയാനി ഇൻഫാന്റിനോ. 2026 ലോകകപ്പിന് ശേഷം ഫിഫയുടെ ബന്ധപ്പെട്ട സമിതികൾ ഇക്കാര്യം പരിശോധിക്കുമെന്ന് അദ്ദേഹം വ്യക്തമാക്കി.
2026 ലോകകപ്പ് ആദ്യമായാണ് 48 ടീമുകളുമായി നടക്കുന്നത്. നേരത്തെ 1998 മുതൽ 2022 വരെ ലോകകപ്പിൽ 32 ടീമുകളായിരുന്നു. 48 ടീമുകളാക്കിയ തീരുമാനം ശരിയായിരുന്നുവെന്നും പുതിയ ഫോർമാറ്റ് വലിയ വിജയമാണെന്നും ഇൻഫാന്റിനോ അഭിപ്രായപ്പെട്ടു. കൂടുതൽ രാജ്യങ്ങൾക്ക് ലോകകപ്പിൽ പങ്കെടുക്കാൻ അവസരം നൽകുന്നത് ആഗോള ഫുട്ബോളിന്റെ വളർച്ചയ്ക്ക് സഹായകരമാണെന്നും അദ്ദേഹം പറഞ്ഞു.
2030 ലോകകപ്പിൽ 64 ടീമുകളെ ഉൾപ്പെടുത്തണമെന്ന ആശയം നേരത്തെ ദക്ഷിണ അമേരിക്കൻ ഫുട്ബോൾ കോൺഫെഡറേഷൻ (കോൺമെബോൾ) മുന്നോട്ടുവച്ചിരുന്നു. 2030 ലോകകപ്പിന്റെ ശതാബ്ദി ആഘോഷത്തിന്റെ ഭാഗമായി ഒരിക്കൽ മാത്രമായി 64 ടീമുകളെ ഉൾപ്പെടുത്തണമെന്നായിരുന്നു നിർദേശം.
എന്നാൽ 2030 ലോകകപ്പ് 64 ടീമുകളുമായി നടത്താൻ ഫിഫ ഇതുവരെ തീരുമാനമെടുത്തിട്ടില്ല. മത്സരത്തിന്റെ ഘടനയും ടീമുകളുടെ എണ്ണവും സംബന്ധിച്ച ഔദ്യോഗിക തീരുമാനം പിന്നീട് ഉണ്ടാകും. 64 ടീമുകളെ ഉൾപ്പെടുത്തിയാൽ 16 ഗ്രൂപ്പുകളിലായി നാല് ടീമുകൾ വീതം മത്സരിപ്പിക്കുന്ന രീതിയടക്കമുള്ള സാധ്യതകൾ ചർച്ചയിലുണ്ട്.
2030 ലോകകപ്പിന് സ്പെയിൻ, പോർച്ചുഗൽ, മൊറോക്കോ എന്നിവയാണ് പ്രധാന ആതിഥേയ രാജ്യങ്ങൾ. അർജന്റീന, ഉറുഗ്വേ, പരാഗ്വേ എന്നിവിടങ്ങളിലും ശതാബ്ദി ആഘോഷത്തിന്റെ ഭാഗമായി മത്സരങ്ങൾ നടക്കും.
