യാത്ര വിവരണം
മഞ്ഞുമൂടിയ ഒരു കുന്നിന് മുകളില് പോകണമെന്ന് തോന്നിയപ്പോള് മനസ്സിലെത്തിയത് ഇല്ലിക്കല് കല്ലായിരുന്നു.കൂടുതല് ആലോചിച്ചാല് യാത്ര മാറ്റിവെക്കേണ്ടി വരുമെന്നറിയാം.അങ്ങനെ രാവിലെ എട്ടുമണിയോടെ യാത്ര തുടങ്ങി.
മേഘങ്ങളുടെ നാട്ടിലേക്ക്
കോട്ടയം ജില്ലയിലെ ഏറ്റവും ഉയരമുള്ള കൊടുമുടി,സമുദ്രനിരപ്പില് നിന്ന് നാലായിരം അടി ഉയരത്തില് പ്രകൃതിയുടെ ശക്തികളെ വെല്ലുവിളിക്കുന്നതുപോലെ നില്ക്കുന്നു ഇല്ലിക്കല് കല്ല്. മീനച്ചിലാറിന്റെ തുടക്കസ്ഥാനമായ ഈ കൊടുമുടി ഈരാറ്റുപേട്ടയ്ക്കടുത്താണ്. കൂടക്കല്ല്, കൂനന്കല്ല്,നരകപ്പാലം,എന്നിങ്ങനെ മൂന്നു പാറക്കൂട്ടങ്ങള് ചേര്ന്നാണ് ഇത് നില്ക്കുന്നത്.
താഴ്ഭാഗത്തെ പാര്ക്കിംഗ് ഗ്രൗണ്ടില് എത്തിയപ്പോള്, അവിടത്തെ സൗകര്യങ്ങള് കണ്ട് സന്തോഷമായി.വിശാലമായ പാര്ക്കിംഗ്,ശുചിത്വമുള്ള ടോയ്ലറ്റുകള്,സൗഹാര്ദ്ദപരമായ സ്റ്റാഫ്,ചെറുകിട ഭക്ഷണശാലകള് – സഞ്ചാരികള്ക്കാവശ്യമായ എല്ലാ സൗകര്യങ്ങളുമുണ്ട്.
മുകളിലേക്ക് സ്വകാര്യ വാഹനങ്ങള് അനുവദിക്കാത്തതിനാല്,ആളൊന്നിന് 39 രൂപ മാത്രം നല്കി കമാന്ഡര് ജീപ്പില് യാത്ര ചെയ്തു.കുലുങ്ങി കുലുങ്ങി മുകളിലേക്ക് കയറുന്ന ജീപ്പ് യാത്ര തന്നെ ഒരനുഭവമായിരുന്നു.
കാഴ്ചകളുടെ വിരുന്ന്
മുകളിലെത്തിയപ്പോള് കണ്ട കാഴ്ച വിവരിക്കാന് വാക്കുകളിലാവില്ല.രണ്ടു വശവും ചെങ്കുത്തായ കൊക്കുകള്.മൂടല്മഞ്ഞില്ലാത്ത നേരത്ത് താഴെയുള്ള പട്ടണങ്ങള് പച്ചക്കടലിലെ ചെറിയ കുത്തുകള് പോലെയും,മീനച്ചിലാറിന്റെ കൈവഴികള് ദൂരെ ഞരമ്പുകള് പോലെയും കാണും.
ഇല്ലിക്കല് കല്ലിന്റെ ഏറ്റവും വലിയ പ്രത്യേകത അതിന്റെ മൂടല്മഞ്ഞാണ്.ഒരു നിമിഷത്തിനുള്ളില് ചുറ്റും കനത്ത മഞ്ഞ് വന്ന് തൊട്ടടുത്തുള്ളവരെപ്പോലും കാണാതാകും. മേഘങ്ങള്ക്കിടയിലൂടെ നടക്കുന്ന അനുഭൂതി അവിശ്വസനീയമാണ്.ആളെ പറത്തിക്കൊണ്ടുപോകുംവിധം ശക്തമായ കാറ്റ് വീശുന്നുണ്ട്.
സുരക്ഷാ മുന്നറിയിപ്പുകള്
അരയടി മാത്രം വീതിയുള്ള ‘നരകപാലം’ എന്ന ഭാഗം അത്യന്തം അപകടകരമാണ്. 2016-ല് ഇവിടെ രണ്ടു ജീവനുകള് പൊലിഞ്ഞതിന്റെ ഓര്മ്മ സന്ദര്ശകര്ക്ക് മുന്നറിയിപ്പാണ്. സെല്ഫി എടുക്കുമ്പോള് പ്രത്യേകം ശ്രദ്ധിക്കണം. ഇടിമിന്നല് സാധ്യതാ മേഖലയായതിനാല് മഴക്കാലത്ത്, പ്രത്യേകിച്ച് ഇടിമിന്നലുള്ള സമയത്ത് ഇവിടെ വരുന്നത് അപകടകരമാണ്.
യാത്രാവിവരം
എത്തിച്ചേരാന്: കോട്ടയം, പാലാ, ഈരാറ്റുപേട്ട, തീക്കോയി വഴി
പ്രവേശനം: 10 | പാര്ക്കിംഗ്: 10 ജീപ്പ് സഫാരി: 39
അവിസ്മരണീയമായ അനുഭവം
സന്തോഷം നല്കിയ യാത്രയായിരുന്നു ഇത്.വൈവിധ്യമാര്ന്ന ദൃശ്യഭംഗികള്,മൂടല്മഞ്ഞിന്റെ മാമരം,ശക്തമായ കാറ്റിന്റെ തഴുകല് – ഇതെല്ലാം ജീവിതത്തിലെ അവിസ്മരണീയ നിമിഷങ്ങളായി.
വണ്ഡേ ട്രിപ്പിന് അനുയോജ്യമായ ഇല്ലിക്കല് കല്ല്, സാഹസികരെയും പ്രകൃതിസ്നേഹികളെയും ഒരുപോലെ ആകര്ഷിക്കുന്നു.ചില നല്ല നിമിഷങ്ങള് ജീവിതത്തില് പിന്നീട് നല്ല ഓര്മ്മകളായി മാറുന്നു – ഇല്ലിക്കല് കല്ലിലെ ഓരോ നിമിഷവും അങ്ങനെയുള്ളതാണ്. മേഘങ്ങളുടെ നാട്ടിലേക്ക് സ്നേഹത്തോടെ എല്ലാവരേയും സ്വാഗതം ചെയ്യുന്നു!
സിജു ജേക്കബ്
സഞ്ചാരി ,എഴുത്തുകാരന്
