സിഡ്നി: നാല് ദിവസത്തെ ഔദ്യോഗിക സന്ദർശനത്തിനായി ഇസ്രായേൽ പ്രസിഡന്റ് ഐസക് ഹെർസോഗ് ഇന്ന് രാവിലെ സിഡ്നിയിലെത്തി. കഴിഞ്ഞ ഡിസംബറിൽ ബോണ്ടി ബീച്ചിലെ ഹനൂക്ക ആഘോഷങ്ങൾക്കിടെ നടന്ന വെടിവെപ്പിൽ കൊല്ലപ്പെട്ടവർക്ക് ആദരാഞ്ജലി അർപ്പിക്കാനാണ് അദ്ദേഹം പ്രധാനമായും എത്തിയത്. എന്നാൽ, സന്ദർശനത്തിനെതിരെ സിഡ്നി ഉൾപ്പെടെയുള്ള പ്രമുഖ നഗരങ്ങളിൽ പലസ്തീൻ അനുകൂല സംഘടനകൾ വൻ പ്രതിഷേധ പ്രകടനങ്ങൾ നടത്തി.
വിമാനമിറങ്ങിയ ഉടൻ ഹെർസോഗ് ബോണ്ടി ബീച്ചിലെ സ്മാരകത്തിലെത്തി പുഷ്പചക്രം അർപ്പിച്ചു. കൊല്ലപ്പെട്ടവരുടെ കുടുംബാംഗങ്ങളെയും അതിജീവിച്ചവരെയും അദ്ദേഹം നേരിൽ കണ്ട് സംസാരിച്ചു. ലോകത്തെവിടെയുമുള്ള ജൂതർക്കെതിരെയുള്ള ആക്രമണങ്ങൾ വേദനിപ്പിക്കുന്നതാണെന്ന് അദ്ദേഹം ചടങ്ങിൽ പറഞ്ഞു.
അതേസമയം, സന്ദർശനത്തോടനുബന്ധിച്ച് സിഡ്നി ടൗൺ ഹാളിന് മുന്നിൽ ആയിരക്കണക്കിന് ആളുകൾ ഒത്തുകൂടി പ്രതിഷേധിച്ചു. ഗസ്സയിലെ സൈനിക നടപടികളിൽ പ്രതിഷേധിച്ചായിരുന്നു പ്രകടനം. പ്രതിഷേധക്കാരെ പിരിച്ചുവിടാൻ പോലീസ് കുരുമുളക് സ്പ്രേ പ്രയോഗിച്ചു. സന്ദർശനത്തെ ഒരു ‘മേജർ ഇവന്റ്’ ആയി പ്രഖ്യാപിച്ചതോടെ ന്യൂ സൗത്ത് വെയിൽസ് പോലീസിന് പ്രത്യേക അധികാരങ്ങൾ നൽകിയിട്ടുണ്ട്. നഗരത്തിൽ അതീവ ജാഗ്രത തുടരുകയാണ്.
പ്രധാനമന്ത്രി ആന്തണി ആൽബനീസി ഹെർസോഗിനെ സ്വാഗതം ചെയ്തുവെങ്കിലും, ഗ്രീൻസ് ഉൾപ്പെടെയുള്ള ചില രാഷ്ട്രീയ പാർട്ടികൾ സന്ദർശനത്തെ വിമർശിച്ചു. അടുത്ത ദിവസങ്ങളിൽ ഹെർസോഗ് കാൻബറയിലേക്കും മെൽബണിലേക്കും തിരിക്കും
