സിഡ്നി: ന്യൂ സൗത്ത് വെയ്ൽസ് തീരങ്ങളിൽ മാസങ്ങളായി അടിഞ്ഞുകൂടിയ കറുത്ത മാലിന്യഗോളങ്ങളുടെ ഉറവിടം കണ്ടെത്തിയതിനെത്തുടർന്ന് സിഡ്നി വാട്ടറിനെതിരെ കർശന നടപടിയുമായി എൻവയൺമെന്റ് പ്രൊട്ടക്ഷൻ അതോറിറ്റി (EPA). മലാബാർ മലിനജല സംസ്കരണ പ്ലാന്റിലെ കടലിലേക്കുള്ള പൈപ്പുകളിൽ അടിഞ്ഞുകൂടിയ കൊഴുപ്പും എണ്ണയും ഗ്രീസും കലർന്ന ഖരരൂപത്തിലുള്ള മാലിന്യക്കൂമ്പാരം അഥവാ ‘ഫാറ്റ്ബർഗ്’ (Fatberg) ഉടൻ നീക്കം ചെയ്യാൻ ഇ.പി.എ ഉത്തരവിട്ടു.
മലാബാർ പ്ലാന്റിലെ കടലിനടിയിലുള്ള പൈപ്പുകളുടെ അറ്റത്ത് എത്തിപ്പെടാൻ പ്രയാസമുള്ള ഭാഗത്താണ് ഈ മാലിന്യക്കട്ടകൾ രൂപപ്പെട്ടതെന്ന് കണ്ടെത്തിയിട്ടുണ്ട്. മലിനീകരണം കുറയ്ക്കുന്നതിനുള്ള പ്രത്യേക പദ്ധതിയുടെ (Pollution Reduction Program) ഭാഗമായി സിഡ്നി വാട്ടറിന് ഇ.പി.എ നിരവധി നിർദ്ദേശങ്ങൾ നൽകി. കടലിലെ പൈപ്പുകളിൽ നിന്നുള്ള മാലിന്യം നീക്കം ചെയ്യുന്നതിനൊപ്പം, കനത്ത മഴയുള്ള സമയത്ത് മലിനജലം പുറത്തേക്ക് ഒഴുകുന്നത് തടയാനുള്ള സംവിധാനങ്ങൾ ഏർപ്പെടുത്താനും നിർദ്ദേശമുണ്ട്.
ഇനി ഇത്തരം സംഭവങ്ങൾ ആവർത്തിക്കാതിരിക്കാൻ അടുത്ത 10 വർഷത്തിനുള്ളിൽ 300 കോടി ഡോളർ ചെലവഴിച്ച് സിഡ്നിയിലെ മലിനജല സംസ്കരണ സംവിധാനം നവീകരിക്കുമെന്ന് സർക്കാർ അറിയിച്ചു. ഗ്ലെൻഫീൽഡ്, ലിവർപൂൾ പ്ലാന്റുകൾ നവീകരിക്കുന്നതിലൂടെ മലാബാർ പ്ലാന്റിലെ അമിത ജോലിഭാരം കുറയ്ക്കാനാണ് ലക്ഷ്യമിടുന്നത്. കൂടാതെ, വീടുകളിൽ നിന്നും റെസ്റ്റോറന്റുകളിൽ നിന്നും എണ്ണയും കൊഴുപ്പും ഓടകളിലേക്ക് ഒഴിക്കരുതെന്ന് ജനങ്ങളെ ബോധവൽക്കരിക്കാനും പദ്ധതിയുണ്ട്.
ഇത്തരം മാലിന്യഗോളങ്ങളുടെ രൂപീകരണത്തെക്കുറിച്ച് പഠിക്കാനും ആർട്ടിഫിഷ്യൽ ഇന്റലിജൻസ് (AI) ഉൾപ്പെടെയുള്ള സാങ്കേതികവിദ്യകൾ ഉപയോഗിച്ച് ഇവ നിരീക്ഷിക്കാനും സിഡ്നി വാട്ടറിനോട് ആവശ്യപ്പെട്ടിട്ടുണ്ട്. 2024 ഒക്ടോബർ മുതൽ സിഡ്നിയിലെ പ്രശസ്തമായ ബൊണ്ടായ് ഉൾപ്പെടെയുള്ള ഡസൻ കണക്കിന് ബീച്ചുകളിൽ ഈ മലിനവസ്തുക്കൾ അടിഞ്ഞുകൂടിയത് വലിയ ആശങ്കയുണ്ടാക്കിയിരുന്നു. നമ്മുടെ കടൽത്തീരങ്ങൾ മലിനമാകാതെ സംരക്ഷിക്കേണ്ട ഉത്തരവാദിത്തം സിഡ്നി വാട്ടറിനാണെന്ന് ഇ.പി.എ എക്സിക്യൂട്ടീവ് ഡയറക്ടർ സ്റ്റീവ് ബീമാൻ വ്യക്തമാക്കി.
