ഗോൾഡ് കോസ്റ്റ്: കഴിഞ്ഞ ഒക്ടോബറിൽ ഗോൾഡ് കോസ്റ്റിലുണ്ടായ ദാരുണമായ കാറപകടത്തിൽ മൂന്ന് വയസുകാരൻ മരിച്ച സംഭവത്തിൽ മാതാപിതാക്കൾക്കെതിരെ പോലീസ് കൊലക്കുറ്റം ചുമത്തി. സ്റ്റാപ്പിൽട്ടണിൽ നടന്ന അപകടത്തിൽ കേഡൻ കേസ് എന്ന ബാലനാണ് കൊല്ലപ്പെട്ടത്. കുട്ടിയുടെ മാതാവ് അനീഷ ഡെയ്സി കേസ് (23), പിതാവ് സാമുവൽ ഇയാൻ പാറ്റേഴ്സൺ (24) എന്നിവർക്കെതിരെയാണ് നടപടി.
ഒക്ടോബർ 25-ന് പുലർച്ചെ അഞ്ച് മണിയോടെയാണ് കുടുംബം സഞ്ചരിച്ചിരുന്ന വൈറ്റ് മാസ്ഡ കാർ നിയന്ത്രണം വിട്ട് റോഡരികിലെ കുറ്റിക്കാട്ടിലേക്ക് മറിഞ്ഞത്. തലയ്ക്ക് ഗുരുതരമായി പരിക്കേറ്റ കേഡനെയും മാതാവിനെയും ഒരു ദൃക്സാക്ഷി ഉടൻ തന്നെ ബീൻലീ പോലീസ് സ്റ്റേഷനിൽ എത്തിച്ചെങ്കിലും കുട്ടി അവിടെ വെച്ച് മരണപ്പെടുകയായിരുന്നു.
അപകടസമയത്ത് അനീഷയാണ് വാഹനമോടിച്ചിരുന്നതെന്ന് പോലീസ് കണ്ടെത്തി. അപകടം നടന്ന ഉടൻ തന്നെ പിതാവ് സാമുവൽ പരിക്കേൽക്കാത്ത ഒരു വയസ്സുള്ള മറ്റൊരു മകനുമായി സംഭവസ്ഥലത്തുനിന്ന് ഓടി രക്ഷപ്പെട്ടതായും പോലീസ് ആരോപിക്കുന്നു. പിന്നീട് സമീപത്തെ ഒരു വീട്ടിൽ നിന്നാണ് ഇവരെ കണ്ടെത്തിയത്. രണ്ടാമത്തെ കുഞ്ഞിനെ ആശുപത്രിയിൽ എത്തിച്ച് പ്രാഥമിക പരിശോധനകൾ നടത്തി സുരക്ഷിതനാണെന്ന് ഉറപ്പുവരുത്തിയിരുന്നു.
ജാമ്യവ്യവസ്ഥകൾ ലംഘിച്ചതുൾപ്പെടെയുള്ള മറ്റ് കുറ്റങ്ങൾ കൂടി ചുമത്തി സാമുവൽ പാറ്റേഴ്സൺ നിലവിൽ പോലീസ് കസ്റ്റഡിയിലാണ്. കേസിൽ കൂടുതൽ അന്വേഷണങ്ങൾ നടന്നുവരികയാണെന്ന് അധികൃതർ അറിയിച്ചു.
