മെൽബൺ: ഇവാൻഹോയിൽ മെൽബൺ നഗരത്തിന്റെ ആകാശദൃശ്യങ്ങൾ (Skyline) ഫോട്ടോ എടുക്കാനായി ക്രെയിനിന് മുകളിൽ കയറി കുടുങ്ങിയ 17-കാരനെ രണ്ട് മണിക്കൂർ നീണ്ട അതിസാഹസികമായ ദൗത്യത്തിലൂടെ രക്ഷപ്പെടുത്തി. 30 മീറ്റർ ഉയരമുള്ള ക്രെയിനിന് മുകളിൽ കയറിയ ജെയ്സൺ എന്ന കൗമാരക്കാരനാണ് താഴേക്ക് ഇറങ്ങാൻ സാധിക്കാതെ അവിടെ കുടുങ്ങിയത്.
രാത്രി എട്ടു മണിയോടെ ഒരാൾ വിവരം അറിയിച്ചതിനെ തുടർന്ന് വൻ സന്നാഹങ്ങളുമായാണ് എമർജൻസി സർവീസുകൾ സ്ഥലത്തെത്തിയത്. രക്ഷാപ്രവർത്തനത്തിനായി എത്തിയ വാഹനങ്ങളുടെയും ഉപകരണങ്ങളുടെയും വെളിച്ചം കൊണ്ട് പ്രദേശം ആകെ പ്രകാശഭരിതമായിരുന്നുവെന്ന് ദൃക്സാക്ഷികൾ പറഞ്ഞു. കയ്യിലുണ്ടായിരുന്ന ഫോൺ പ്രവർത്തിക്കാതിരുന്നതിനെ തുടർന്ന് ജെയ്സൺ തന്റെ സ്കൂൾ ബാഗിൽ നിന്നും കടലാസുകൾ കീറി അതിൽ കുറിപ്പുകളെഴുതി താഴേക്ക് എറിഞ്ഞാണ് അധികൃതരുമായി ആശയവിനിമയം നടത്തിയത്.
“എന്റെ ശബ്ദം അത്ര ഉച്ചത്തിലല്ലാത്തതിനാലാണ് ഞാൻ കുറിപ്പുകൾ താഴേക്ക് എറിഞ്ഞത്. ഷൂസ് നനഞ്ഞിരുന്നതിനാൽ താഴേക്ക് ഇറങ്ങുന്നത് സുരക്ഷിതമല്ലെന്ന് ഞാൻ അവരെ അറിയിച്ചു,” ജെയ്സൺ പറഞ്ഞു. രക്ഷാപ്രവർത്തകർ ജെയ്സണുമായി നിരന്തരം സംസാരിക്കുകയും അവനെ ശാന്തനാക്കി നിർത്താൻ ശ്രമിക്കുകയും ചെയ്തു. “അവർ അവനോട് സമാധാനമായി സംസാരിക്കുകയായിരുന്നു. നിനക്ക് കുഴപ്പമൊന്നുമുണ്ടാവില്ല എന്ന് അവർ ആശ്വസിപ്പിക്കുന്നുണ്ടായിരുന്നു,” ഒരു ദൃക്സാക്ഷി വിവരിച്ചു.
വലിയ രീതിയിലുള്ള രക്ഷാപ്രവർത്തന സന്നാഹങ്ങൾ ഇതിനായി ഉപയോഗിക്കേണ്ടി വന്നെങ്കിലും, ജെയ്സനെതിരെ നിയമനടപടികൾ സ്വീകരിക്കാൻ സാധ്യതയില്ലെന്നാണ് പോലീസ് നൽകുന്ന സൂചന. ഈ അനുഭവം തനിക്ക് വലിയൊരു പാഠമാണെന്ന് ജെയ്സൺ പിന്നീട് പറഞ്ഞു. “ഞാൻ ഒരു പാഠം പഠിച്ചു. ഇത് അതീവ അപകടകരമാണ്. മിക്കവാറും ശിക്ഷാ നടപടികൾ നേരിടേണ്ടി വരുമായിരുന്നു, ഇത്തവണ ഞാൻ രക്ഷപ്പെട്ടു,” അവൻ കൂട്ടിച്ചേർത്തു.
