പെർത്ത്: വെസ്റ്റേൺ ഓസ്ട്രേലിയയിലെ മുസ്ലിം സമൂഹത്തെയും സർക്കാർ സ്ഥാപനങ്ങളെയും ലക്ഷ്യമിട്ട് വൻതോതിലുള്ള കൂട്ടക്കൊലയ്ക്ക് (Mass casualty attack) പദ്ധതിയിട്ട 20-കാരനെ പോലീസ് പിടികൂടി. ബിന്ദൂൺ സ്വദേശിയായ ജെയ്സൺ ജോസഫ് മൈക്കിൾസ് എന്ന യുവാവിനെയാണ് വെസ്റ്റേൺ ഓസ്ട്രേലിയൻ പോലീസ് അറസ്റ്റ് ചെയ്തത്. സംസ്ഥാനത്തിന്റെ ചരിത്രത്തിൽ ആദ്യമായാണ് ഒരാൾക്കെതിരെ ഭീകരാക്രമണത്തിനുള്ള തയ്യാറെടുപ്പ് നടത്തിയെന്ന കുറ്റം ചുമത്തുന്നത്.
വ്യാഴാഴ്ച മൈക്കിൾസിന്റെ വീട്ടിൽ നടത്തിയ തിരച്ചിലിൽ ഏഴ് തോക്കുകൾ, വലിയ കത്തികളുടെ ശേഖരം, വ്യാജ തോക്കുകൾ, ബാലിസ്റ്റിക് വെസ്റ്റ്, ഗ്യാസ് മാസ്കുകൾ, ലോക്ക് പിക്കിംഗ് ഉപകരണങ്ങൾ എന്നിവ പോലീസ് പിടിച്ചെടുത്തു. പ്രതിയുടെ പക്കൽ നിന്നും ലഭിച്ച ഒരു നോട്ട്ബുക്കിൽ വാ പോലീസ് ആസ്ഥാനം, പാർലമെന്റ് ഹൗസ്, സംസ്ഥാനത്തെ വിവിധ മുസ്ലിം ആരാധനാലയങ്ങൾ എന്നിവിടങ്ങളിൽ ആക്രമണം നടത്താനുള്ള കൃത്യമായ പദ്ധതികൾ രേഖപ്പെടുത്തിയിരുന്നതായി പോലീസ് കോടതിയിൽ അറിയിച്ചു. പ്രതി സ്ഫോടകവസ്തുക്കൾ സംഘടിപ്പിക്കാൻ ശ്രമിച്ചിരുന്നതായും റിപ്പോർട്ടുകളുണ്ട്.
പ്രതി ഒറ്റയ്ക്കാണ് നീക്കങ്ങൾ നടത്തിയതെന്നും ‘വൈറ്റ് സുപ്രീമസി’ (White supremacist) എന്നറിയപ്പെടുന്ന തീവ്ര വംശീയ പ്രത്യയശാസ്ത്രമാണ് ഇയാളെ നയിച്ചിരുന്നതെന്നും അന്വേഷണ ഉദ്യോഗസ്ഥർ പറഞ്ഞു. ഇന്റർനെറ്റിലെ എൻക്രിപ്റ്റഡ് പ്ലാറ്റ്ഫോമുകൾ വഴി ഇയാൾ തീവ്രവാദ ആശയങ്ങളിലേക്ക് ആകൃഷ്ടനാകുകയായിരുന്നു. മുസ്ലിം വിരുദ്ധവും ജൂത വിരുദ്ധവുമായ ആശയങ്ങൾ പങ്കുവെച്ചതിലൂടെ കഴിഞ്ഞ ജനുവരി മുതൽ ഇയാൾ പോലീസിന്റെ നിരീക്ഷണത്തിലായിരുന്നു.
സംഭവത്തെ “അതീവ ഞെട്ടിപ്പിക്കുന്നത്” എന്നാണ് പ്രധാനമന്ത്രി ആന്തണി ആൽബനീസ് വിശേഷിപ്പിച്ചത്. “ആരാധനാലയങ്ങളെയും പോലീസിനെയും ലക്ഷ്യമിട്ടുള്ള ഇത്തരം നീക്കങ്ങൾ അസ്വസ്ഥതയുണ്ടാക്കുന്നതാണ്. കുറ്റവാളി നിയമത്തിന്റെ പരമാവധി ശിക്ഷ അനുഭവിക്കണം,” അദ്ദേഹം പറഞ്ഞു. ആർക്കും ആർക്കെതിരെയും വംശീയമോ മതപരമോ ആയ വിദ്വേഷം പ്രചരിപ്പിക്കാൻ അവകാശമില്ലെന്നും അദ്ദേഹം കൂട്ടിച്ചേർത്തു. ഓസ്ട്രേലിയയിൽ ഇസ്ലാമോഫോബിയ (Islamophobia) വർധിച്ചുവരുന്ന സാഹചര്യത്തിൽ മുസ്ലിം സമൂഹത്തിന്റെ സുരക്ഷ ഉറപ്പാക്കുമെന്ന് ആഭ്യന്തര മന്ത്രി ടോണി ബർക്കും വ്യക്തമാക്കി.
പ്രതിയെ വെള്ളിയാഴ്ച പെർത്ത് മജിസ്ട്രേറ്റ് കോടതിയിൽ ഹാജരാക്കി. ജാമ്യം നിഷേധിക്കപ്പെട്ട ഇയാളെ റിമാൻഡ് ചെയ്തു. കേസ് മാർച്ച് 23-ന് വീണ്ടും പരിഗണിക്കും. സമൂഹത്തിന് നിലവിൽ ഭീഷണിയില്ലെന്നും ജാഗ്രത തുടരുമെന്നും പ്രീമിയർ റോജർ കുക്ക് അറിയിച്ചു
