മനാമ/ടെഹ്റാൻ: അമേരിക്കയുടെയും ഇസ്രായേലിന്റെയും സംയുക്ത സൈനിക നടപടിക്ക് തിരിച്ചടിയായി പശ്ചിമേഷ്യയിലുടനീളം ഇറാൻ ശക്തമായ മിസൈൽ ആക്രമണം ആരംഭിച്ചു. ബഹ്റൈൻ തലസ്ഥാനമായ മനാമയിലെ അമേരിക്കൻ അഞ്ചാം നാവിക വ്യൂഹത്തിന്റെ ആസ്ഥാനത്തിന് (Naval Support Activity Bahrain) നേരെ ഇറാൻ തൊടുത്തുവിട്ട മിസൈലുകൾ പതിച്ചു. ആക്രമണത്തെത്തുടർന്ന് താവളത്തിന് സമീപത്തുനിന്നും വലിയ തോതിൽ കറുത്ത പുക ഉയരുന്നതായി റിപ്പോർട്ടുകളുണ്ട്. എന്നാൽ നാശനഷ്ടങ്ങളുടെ വ്യാപ്തി എത്രയാണെന്ന് അമേരിക്ക ഔദ്യോഗികമായി വെളിപ്പെടുത്തിയിട്ടില്ല.
അമേരിക്കൻ സൈനിക താവളങ്ങളുള്ള യു.എ.ഇ, ഖത്തർ, കുവൈത്ത്, ജോർദാൻ എന്നീ രാജ്യങ്ങളും തങ്ങളുടെ ആകാശസീമയിൽ ഇറാനിയൻ മിസൈലുകൾ തടഞ്ഞതായി അറിയിച്ചു. പശ്ചിമേഷ്യയിലെ ഏറ്റവും വലിയ അമേരിക്കൻ താവളമായ ഖത്തറിലെ അൽ-ഉദൈദ് എയർ ബേസ് ലക്ഷ്യമാക്കി വന്ന നിരവധി മിസൈലുകൾ തകർത്തതായി ഖത്തർ പ്രതിരോധ മന്ത്രാലയം വ്യക്തമാക്കി. മേഖലയിലെ വിവിധ താവളങ്ങളിലായി ഏകദേശം മുപ്പതിനായിരത്തിലധികം അമേരിക്കൻ സൈനികരാണ് നിലവിലുള്ളത്.
ശനിയാഴ്ച രാവിലെ അമേരിക്കയും ഇസ്രായേലും സംയുക്തമായി ആരംഭിച്ച ആക്രമണത്തിന് മറുപടിയായി ‘ഓപ്പറേഷൻ ട്രൂത്ത്ഫുൾ പ്രോമിസ് 4’ എന്ന പേരിലാണ് ഇറാൻ പ്രത്യാക്രമണം നടത്തുന്നത്. അമേരിക്കൻ ആസ്തികളെയും താവളങ്ങളെയും ലക്ഷ്യം വെച്ചാണ് നീക്കമെന്ന് ഇസ്ലാമിക് റെവല്യൂഷണറി ഗാർഡ് കോർപ്സ് (IRGC) പ്രസ്താവനയിൽ പറഞ്ഞു. ഇതിനിടെ, യു.എ.ഇക്ക് നേരെ നടന്ന ആക്രമണത്തിൽ മിസൈൽ അവശിഷ്ടങ്ങൾ അബുദാബിയിലെ ജനവാസ മേഖലയിൽ പതിച്ച് ഒരു സാധാരണക്കാരൻ കൊല്ലപ്പെടുകയും കെട്ടിടങ്ങൾക്ക് നാശനഷ്ടങ്ങൾ സംഭവിക്കുകയും ചെയ്തു. ഇത് ഇറാന്റെ ഭാഗത്തുനിന്നുള്ള നഗ്നമായ ആക്രമണമാണെന്ന് യു.എ.ഇ പ്രതിരോധ മന്ത്രാലയം കുറ്റപ്പെടുത്തി.
ഇറാനിൽ നിന്നുള്ള മിസൈൽ വർഷത്തെത്തുടർന്ന് ഇസ്രായേലിലുടനീളം ശനിയാഴ്ച സൈറണുകൾ മുഴങ്ങി. മിക്ക മിസൈലുകളും ആകാശത്തുവെച്ച് തന്നെ തകർത്തതായി ഇസ്രായേൽ സൈന്യം അവകാശപ്പെട്ടു. അയൽരാജ്യമായ ജോർദാനും തങ്ങളുടെ മണ്ണിലേക്ക് ലക്ഷ്യമിട്ടു വന്ന രണ്ട് ബാലിസ്റ്റിക് മിസൈലുകൾ വെടിവച്ചിട്ടു. അമേരിക്കയുടെയും ഇസ്രായേലിന്റെയും നടപടി നിയമവിരുദ്ധമാണെന്നും അക്രമികൾ അർഹിക്കുന്ന പാഠം പഠിപ്പിക്കാൻ ഇറാൻ സൈന്യം സജ്ജമാണെന്നും വിദേശകാര്യ മന്ത്രി അബ്ബാസ് അരാഗ്ചി മുന്നറിയിപ്പ് നൽകി. മേഖല അതീവ ജാഗ്രതയിലാണ്.
