മെൽബൺ/വാഷിംഗ്ടൺ: ഇറാനെതിരെ അമേരിക്കയും ഇസ്രായേലും നടത്തിയ സംയുക്ത സൈനിക നീക്കത്തിന് പിന്നാലെ ആഗോള വിപണിയിൽ ക്രൂഡ് ഓയിൽ വില കുതിച്ചുയരാൻ സാധ്യതയെന്ന് മുന്നറിയിപ്പ്. മിഡിൽ ഈസ്റ്റിലെ സംഘർഷം രൂക്ഷമാകുന്നതോടെ ഇന്ധന വിതരണം തടസ്സപ്പെടുമെന്ന ആശങ്കയെത്തുടർന്ന് ഓസ്ട്രേലിയയിലെ വാഹന ഉടമകൾ വില വർധിക്കുന്നതിന് മുൻപ് ഇന്ധനം നിറയ്ക്കണമെന്ന് നിർദ്ദേശമുണ്ട്.
ലോകത്തിലെ ഏറ്റവും പ്രധാനപ്പെട്ട എണ്ണക്കടത്തു പാതയായ ‘ഹോർമുസ് കടലിടുക്ക്’ (Strait of Hormuz) ഇറാൻ അടച്ചുപൂട്ടിയേക്കുമെന്നതാണ് വിപണിയെ ആശങ്കയിലാഴ്ത്തുന്നത്. ഞായറാഴ്ചയോടെ ക്രൂഡ് ഓയിൽ വില ബാരലിന് അഞ്ച് യുഎസ് ഡോളർ വരെ വർധിക്കാൻ സാധ്യതയുണ്ടെന്ന് ലിപ്പോ ഓയിൽ അസോസിയേറ്റ്സ് പ്രസിഡന്റ് ആൻഡി ലിപ്പോ മുന്നറിയിപ്പ് നൽകി. ഇറാൻ മേഖലയിലെ എണ്ണക്കപ്പലുകൾക്ക് നേരെ ആക്രമണം നടത്തുകയോ ജലപാത പൂർണ്ണമായും അടയ്ക്കുകയോ ചെയ്താൽ അത് ആഗോള സമ്പദ്വ്യവസ്ഥയെ തന്നെ ബാധിക്കും.
ഹോർമുസ് കടലിടുക്കിന്റെ പ്രാധാന്യം ലോകത്തെ മൊത്തം ദൈനംദിന എണ്ണ ഉൽപാദനത്തിന്റെ അഞ്ചിലൊന്നും (ഏകദേശം 20 ദശലക്ഷം ബാരൽ) കടന്നുപോകുന്നത് കേവലം 33.7 കിലോമീറ്റർ മാത്രം വീതിയുള്ള ഹോർമുസ് കടലിടുക്കിലൂടെയാണ്. പേർഷ്യൻ ഗൾഫിനും ഒമാൻ ഉൾക്കടലിനും ഇടയിലുള്ള ഈ പാതയുടെ വടക്കുഭാഗം ഇറാന്റെ നിയന്ത്രണത്തിലാണ്. സൗദി അറേബ്യ ഉൾപ്പെടെയുള്ള എണ്ണസമ്പന്ന രാജ്യങ്ങൾക്ക് ആഗോള വിപണിയിലേക്ക് ക്രൂഡ് ഓയിൽ എത്തിക്കാനുള്ള ഏക മാർഗ്ഗമാണിത്.
ഏഷ്യൻ രാജ്യങ്ങളെ ബാധിക്കും ഹോർമുസ് കടലിടുക്കിലെ തടസ്സങ്ങൾ ഓസ്ട്രേലിയയെ കൂടാതെ ചൈന, ഇന്ത്യ, ദക്ഷിണ കൊറിയ തുടങ്ങിയ ഏഷ്യൻ രാജ്യങ്ങളെയാകും ഏറ്റവും കൂടുതൽ ബാധിക്കുക. യുഎസ് എനർജി ഇൻഫർമേഷൻ അഡ്മിനിസ്ട്രേഷൻ (EIA) കണക്കുകൾ പ്രകാരം, കഴിഞ്ഞ വർഷം ഈ പാതയിലൂടെ നീങ്ങിയ ക്രൂഡ് ഓയിലിന്റെ 84 ശതമാനവും ഏഷ്യൻ വിപണികളിലേക്കാണ് പോയത്.
ചൈന: പ്രതിദിനം 5.4 ദശലക്ഷം ബാരൽ എണ്ണയാണ് ഈ പാത വഴി ഇറക്കുമതി ചെയ്യുന്നത്.
ഇന്ത്യ: 2.1 ദശലക്ഷം ബാരൽ.
ദക്ഷിണ കൊറിയ: 1.7 ദശലക്ഷം ബാരൽ.
അതേസമയം അമേരിക്കയും യൂറോപ്പും യഥാക്രമം 4 ലക്ഷം, 5 ലക്ഷം ബാരലുകൾ മാത്രമാണ് ഇതേ കാലയളവിൽ ഈ പാത വഴി ഇറക്കുമതി ചെയ്തത്. സൗദി അറേബ്യയുടെ എണ്ണ ഉൽപാദന കേന്ദ്രങ്ങൾക്ക് നേരെയുണ്ടാകുന്ന ഏതൊരു ആക്രമണവും ആഗോള വിപണിയെ തകിടം മറിക്കുമെന്ന് സാമ്പത്തിക വിദഗ്ധർ ചൂണ്ടിക്കാട്ടുന്നു. നിലവിലെ സാഹചര്യത്തിൽ ഓസ്ട്രേലിയയിലെ മെട്രോ നഗരങ്ങളിൽ ഇന്ധനവില ഉടൻ തന്നെ വർധിക്കുമെന്നാണ് റിപ്പോർട്ടുകൾ സൂചിപ്പിക്കുന്നത്.
