ന്യൂഡൽഹി: പശ്ചിമേഷ്യയിലെ സംഘർഷത്തെത്തുടർന്ന് തടസ്സപ്പെട്ട വിമാന സർവീസുകൾ നിയന്ത്രണങ്ങളോടെ ഭാഗികമായി പുനരാരംഭിക്കുന്നു. സുരക്ഷാ മുൻകരുതലിന്റെ ഭാഗമായി കഴിഞ്ഞ ദിവസങ്ങളിൽ റദ്ദാക്കിയ സർവീസുകളിൽ ചിലതാണ് ഇന്നു മുതൽ (മാർച്ച് 3, 2026) വീണ്ടും പ്രവർത്തനസജ്ജമാകുന്നത്. എങ്കിലും വ്യോമപാതയിലെ നിയന്ത്രണങ്ങൾ തുടരുന്നതിനാൽ യാത്രക്കാർക്ക് ജാഗ്രതാ നിർദ്ദേശം നൽകിയിട്ടുണ്ട്.
എയർ ഇന്ത്യ, ഇൻഡിഗോ തുടങ്ങിയ പ്രമുഖ വിമാനക്കമ്പനികൾ യുഎഇ, സൗദി അറേബ്യ ഉൾപ്പെടെയുള്ള രാജ്യങ്ങളിലേക്കുള്ള സർവീസുകൾ ഭാഗികമായി പുനരാരംഭിക്കാൻ തീരുമാനിച്ചു. എന്നാൽ ഇസ്രായേൽ, ഖത്തർ തുടങ്ങിയ രാജ്യങ്ങളിലേക്കുള്ള സർവീസുകളിൽ നിയന്ത്രണം തുടരുകയാണ്.ഇറാൻ, ഇറാഖ് വ്യോമപാതകൾ ഒഴിവാക്കി പകരം സുരക്ഷിതമായ മറ്റ് പാതകളിലൂടെയാണ് വിമാനങ്ങൾ ഇപ്പോൾ സർവീസ് നടത്തുന്നത്. ഇതിനാൽ യാത്രാസമയത്തിൽ വലിയ വർധനവുണ്ടാകും. യൂറോപ്പിലേക്കും അമേരിക്കയിലേക്കും പോകുന്ന വിമാനങ്ങൾ റോം ഉൾപ്പെടെയുള്ള വിദേശ വിമാനത്താവളങ്ങളിൽ സാങ്കേതിക സ്റ്റോപ്പുകൾ അനുവദിച്ചാണ് സർവീസ് നടത്തുന്നത്.
ഫെബ്രുവരി 28-നോ അതിനുമുമ്പോ ടിക്കറ്റ് ബുക്ക് ചെയ്തവർക്ക് മാർച്ച് 7 വരെയുള്ള യാത്രകൾക്ക് അധിക നിരക്കില്ലാതെ തീയതി മാറ്റാനോ ടിക്കറ്റ് തുക പൂർണ്ണമായി തിരികെ വാങ്ങാനോസൗകര്യമുണ്ടാകും.വിമാനങ്ങൾ പുറപ്പെടുന്നതിന് മുൻപായി അതാത് കമ്പനികളുടെ വെബ്സൈറ്റോ ആപ്പോ പരിശോധിച്ച് നിലവിലെ സ്ഥിതി ഉറപ്പുവരുത്തണമെന്ന് സിവിൽ ഏവിയേഷൻ മന്ത്രാലയം അറിയിച്ചു. ഡൽഹി, മുംബൈ, കൊച്ചി വിമാനത്താവളങ്ങളിൽ കഴിഞ്ഞ ദിവസങ്ങളിലുണ്ടായ തിരക്ക് സർവീസുകൾ പുനരാരംഭിക്കുന്നതോടെ കുറയുമെന്നാണ് പ്രതീക്ഷിക്കുന്നത്.പശ്ചിമേഷ്യയിലെ രാഷ്ട്രീയ സാഹചര്യങ്ങൾ നിരന്തരം നിരീക്ഷിച്ചുകൊണ്ടിരിക്കുകയാണെന്നും സുരക്ഷ ഉറപ്പുവരുത്തിക്കൊണ്ട് കൂടുതൽ സർവീസുകൾ വരും ദിവസങ്ങളിൽ സാധാരണ നിലയിലാക്കുമെന്നും അധികൃതർ അറിയിച്ചു.
