തിരുവനന്തപുരം: ടി20 ലോകകപ്പ് വിജയത്തിന് ശേഷം ജന്മനാട്ടിലെത്തിയ മലയാളി ക്രിക്കറ്റ് താരം സഞ്ജു സാംസണ് സംസ്ഥാന സർക്കാർ ഔദ്യോഗിക സ്വീകരണം നൽകുമെന്ന് വിദ്യാഭ്യാസ-തൊഴിൽ വകുപ്പ് മന്ത്രി വി. ശിവൻകുട്ടി. സഞ്ജു കേരളത്തിന്റെ പുത്രനാണെന്നും അദ്ദേഹത്തിന്റെ നേട്ടം ഓരോ മലയാളിക്കും അഭിമാനമാണെന്നും മന്ത്രി പറഞ്ഞു. തിരുവനന്തപുരം അന്താരാഷ്ട്ര വിമാനത്താവളത്തിൽ സഞ്ജുവിനെ സ്വീകരിക്കാനെത്തിയതായിരുന്നു അദ്ദേഹം.
ലോകകപ്പ് കിരീടവുമായി എത്തിയ സഞ്ജുവിന് ഉജ്ജ്വലമായ വരവേൽപ്പാണ് സർക്കാർ തലത്തിലും ക്രിക്കറ്റ് ആരാധകരുടെ ഭാഗത്തുനിന്നും ലഭിച്ചത്. വരും ദിവസങ്ങളിൽ മുഖ്യമന്ത്രിയുടെ സാന്നിധ്യത്തിൽ വിപുലമായ പൗരസ്വീകരണം ഒരുക്കാനാണ് ആലോചിക്കുന്നത്. ഇതിനായുള്ള തിയതിയും വേദിയും ഉടൻ തീരുമാനിക്കുമെന്നും മന്ത്രി അറിയിച്ചു. സഞ്ജുവിന്റെ കഠിനാധ്വാനവും ക്ഷമയുമാണ് അദ്ദേഹത്തെ ഈ വലിയ നേട്ടത്തിൽ എത്തിച്ചതെന്നും യുവ കായിക താരങ്ങൾക്ക് അദ്ദേഹം വലിയൊരു മാതൃകയാണെന്നും വി. ശിവൻകുട്ടി കൂട്ടിച്ചേർത്തു.
വിമാനത്താവളത്തിൽ മന്ത്രിക്ക് പുറമെ എ.എ. റഹീം എം.പി ഉൾപ്പെടെയുള്ള ജനപ്രതിനിധികളും സഞ്ജുവിനെ സ്വീകരിക്കാൻ എത്തിയിരുന്നു. കേരള ക്രിക്കറ്റ് അസോസിയേഷന്റെ (കെ.സി.എ) ആഭിമുഖ്യത്തിലും താരത്തിന് വലിയ രീതിയിലുള്ള ആദരവ് നൽകാൻ തീരുമാനിച്ചിട്ടുണ്ട്. തിരുവനന്തപുരം വിഴിഞ്ഞം സ്വദേശിയായ സഞ്ജുവിനെ സ്വീകരിക്കാൻ ആയിരക്കണക്കിന് ആളുകളാണ് വിമാനത്താവള പരിസരത്ത് തടിച്ചുകൂടിയത്.
