ന്യൂഡൽഹി: അന്താരാഷ്ട്ര ഹോക്കി ഫെഡറേഷൻ (FIH) പുറത്തുവിട്ട 2026-ലെ പുരുഷ ഹോക്കി ലോകകപ്പിനുള്ള പൂൾ ഘടനയിൽ ചിരവൈരികളായ ഇന്ത്യയും പാകിസ്ഥാനും ഒരേ ഗ്രൂപ്പിൽ. പൂൾ ഡി-യിലാണ് ഇരു ടീമുകളും ഇടംപിടിച്ചിരിക്കുന്നത്. ഇന്ത്യക്കും പാകിസ്ഥാനും പുറമെ ഇംഗ്ലണ്ട്, വെയ്ൽസ് എന്നീ ടീമുകളും ഈ ഗ്രൂപ്പിലുണ്ട്.ബെൽജിയവും നെതർലൻഡ്സും സംയുക്തമായാണ് 2026 ആഗസ്റ്റ് 15 മുതൽ 30 വരെ ലോകകപ്പിന് ആതിഥേയത്വം വഹിക്കുന്നത്. പൂൾ ഡി-യിലെ മത്സരങ്ങൾ നെതർലൻഡ്സിലെ ആംസ്റ്റൽവീനിലാണ് നടക്കുക.ഇതേ കാലയളവിൽ തന്നെ നടക്കുന്ന വനിതാ ഹോക്കി ലോകകപ്പിൽ ഇന്ത്യ പൂൾ ഡി-യിലാണ് മത്സരിക്കുന്നത്. ചൈന, ഇംഗ്ലണ്ട്, ദക്ഷിണാഫ്രിക്ക എന്നിവരാണ് ഗ്രൂപ്പിലെ മറ്റ് ടീമുകൾ.2018-ന് ശേഷം ആദ്യമായാണ് ഒരു ലോകകപ്പിൽ ഇന്ത്യയും പാകിസ്ഥാനും നേർക്കുനേർ വരുന്നത് എന്ന പ്രത്യേകതയും ഈ ടൂർണമെന്റിനുണ്ട്. മത്സരങ്ങളുടെ കൃത്യമായ തീയതികളും സമയവും പിന്നീട് പ്രഖ്യാപിക്കും.
ഹോക്കി ലോകകപ്പ് 2026: ഇന്ത്യയും പാകിസ്ഥാനും ഒരേ ഗ്രൂപ്പിൽ; ആവേശപ്പോരാട്ടത്തിന് വേദിയൊരുങ്ങുന്നു
