സിഡ്നി: പടിഞ്ഞാറൻ സിഡ്നിയിലെ ബോസ്ലി പാർക്കിൽ ബസും മോട്ടോർ സൈക്കിളും കൂട്ടിയിടിച്ചുണ്ടായ ദാരുണമായ അപകടത്തിൽ രണ്ട് ആൺകുട്ടികൾ മരിച്ചു. തിങ്കളാഴ്ച വൈകുന്നേരം 7:10-ഓടെ ലിവർപൂൾ പാരാമറ്റ ട്രാൻസിറ്റ്വേയിലായിരുന്നു അപകടം. ട്രയൽ ബൈക്ക് ബസിന്റെ വശത്തിടിക്കുകയും വാഹനത്തിനടിയിൽ കുടുങ്ങുകയുമായിരുന്നുവെന്നാണ് റിപ്പോർട്ടുകൾ.
അപകടത്തിൽപ്പെട്ട 15 വയസ്സുകാരനായ ബൈക്ക് യാത്രക്കാരനും 14 വയസ്സുകാരനായ സഹയാത്രക്കാരനുമാണ് മരിച്ചത്. സംഭവസ്ഥലത്തെത്തിയ എമർജൻസി സർവീസസ് ഉദ്യോഗസ്ഥർ ഇവർക്ക് അടിയന്തര ചികിത്സ നൽകിയെങ്കിലും ജീവൻ രക്ഷിക്കാനായില്ല. അപകടസമയത്ത് ബസിലുണ്ടായിരുന്ന യാത്രക്കാർ ആർക്കും പരിക്കേറ്റിട്ടില്ല. 48 വയസ്സുകാരനായ ബസ് ഡ്രൈവർ പരിക്കേൽക്കാതെ രക്ഷപ്പെട്ടു. ഇദ്ദേഹത്തെ നിർബന്ധിത വൈദ്യപരിശോധനകൾക്കായി ആശുപത്രിയിലേക്ക് മാറ്റിയിട്ടുണ്ട്. സംഭവത്തിൽ പോലീസ് അന്വേഷണം ആരംഭിച്ചു.
