ഭൂട്ടാൻ: സാഫ് (SAFF) അണ്ടർ-20 ഫുട്ബോൾ ചാമ്പ്യൻഷിപ്പിൽ പാകിസ്ഥാനെ എതിരില്ലാത്ത മൂന്ന് ഗോളുകൾക്ക് തകർത്ത് ഇന്ത്യ സെമി ഫൈനലിൽ പ്രവേശിച്ചു. ഗ്രൂപ്പ് ബിയിലെ തങ്ങളുടെ ആദ്യ മത്സരത്തിൽ തന്നെ ആധികാരികമായ വിജയം നേടിയാണ് ഇന്ത്യ അടുത്ത ഘട്ടത്തിലേക്ക് മുന്നേറിയത്.ഇന്ത്യക്കായി മികച്ച ഫോമിലായിരുന്ന തംങ്ലൻസാങ് ഡോഡം ഇരട്ട ഗോളുകൾ നേടി ടീമിന്റെ വിജയത്തിൽ നിർണ്ണായക പങ്കുവഹിച്ചു. മത്സരത്തിന്റെ ആദ്യ പകുതിയിൽ തന്നെ ഇന്ത്യ ലീഡ് നേടിയിരുന്നു. കെ.വി. യാദവിലൂടെയാണ് ഇന്ത്യ ആദ്യ ഗോൾ കണ്ടെത്തിയത്.രണ്ടാം പകുതിയിൽ ഡോഡം തന്റെ ആദ്യ ഗോൾ നേടി ലീഡ് രണ്ടാക്കി ഉയർത്തി. മത്സരത്തിന്റെ അവസാന മിനിറ്റുകളിൽ ലഭിച്ച പെനാൽറ്റി കൃത്യമായി ലക്ഷ്യത്തിലെത്തിച്ചതോടെ ഡോഡം ഗോൾ പട്ടിക തികയ്ക്കുകയും ഇന്ത്യയുടെ വിജയം ഉറപ്പിക്കുകയും ചെയ്തു. ഇതോടെ തുടർച്ചയായ രണ്ട് തോൽവികൾ ഏറ്റുവാങ്ങിയ പാകിസ്ഥാൻ ടൂർണമെന്റിൽ നിന്ന് പുറത്തായി. ഗ്രൂപ്പിലെ അടുത്ത മത്സരത്തിൽ ഇന്ത്യ ബംഗ്ലാദേശിനെ നേരിടും.ടൂർണമെന്റിലെ തുടർച്ചയായ പ്രകടനങ്ങളിലൂടെ നിലവിലെ ചാമ്പ്യന്മാരായ ഇന്ത്യ കിരീടം നിലനിർത്താനുള്ള പോരാട്ടത്തിൽ കരുത്ത് തെളിയിച്ചിരിക്കുകയാണ്.
