സിഡ്നി: അഡ്ലെയ്ഡ് 36ഇയേഴ്സിനെ (Adelaide 36ers) ആവേശകരമായ പോരാട്ടത്തിൽ പരാജയപ്പെടുത്തി സിഡ്നി കിംഗ്സ് എൻ.ബി.എൽ ചാമ്പ്യന്മാരായി. എന്നാൽ വിജയാഘോഷത്തിന്റെ ആവേശത്തിനിടയിൽ ചാമ്പ്യൻഷിപ്പ് ട്രോഫി തകർന്നത് കാണികളിലും താരങ്ങളിലും ഒരുപോലെ പരിഭ്രമമുണ്ടാക്കി. ഞായറാഴ്ച നടന്ന മത്സരത്തിന് ശേഷം പുരസ്കാരങ്ങൾ ഏറ്റുവാങ്ങുന്നതിനിടയിലാണ് സംഭവം.
ആരാധകരുടെ വൻ ആരവങ്ങൾക്കിടയിൽ സിഡ്നി ക്യാപ്റ്റൻ സേവ്യർ കുക്സ് ട്രോഫി ഉയർത്തിപ്പിടിച്ച് ആഘോഷിക്കുന്നതിനിടയിൽ ട്രോഫിയിലെ രണ്ട് ഭാഗങ്ങൾ വേർപെട്ട് താഴെ വീഴുകയായിരുന്നു. അപ്രതീക്ഷിതമായ ഈ സംഭവം കുക്സിനെയും സഹതാരങ്ങളെയും ഒരുപോലെ അമ്പരപ്പിച്ചു. ഇതിഹാസ പരിശീലകൻ ബ്രയാൻ ഗോർജിയന്റെ കീഴിലിറങ്ങിയ സിഡ്നി കിംഗ്സ്, കഴിഞ്ഞ അഞ്ച് വർഷത്തിനിടയിലെ തങ്ങളുടെ മൂന്നാമത്തെ കിരീടമാണ് സ്വന്തമാക്കിയത്.
അഞ്ചാം മത്സരത്തിൽ 113-101 എന്ന നിലയിലായിരുന്നു സിഡ്നിയുടെ വിജയം. സൂപ്പർ താരം കെൻഡ്രിക് ഡേവിസ് 35 പോയിന്റുകളും 14 അസിസ്റ്റുകളുമായി മത്സരത്തിലെ താരമായി. ചാമ്പ്യൻഷിപ്പ് പരമ്പരയിലെ എം.വി.പി പുരസ്കാരവും ഡേവിസ് സ്വന്തമാക്കി. 18,589 കാണികൾ സാക്ഷ്യം വഹിച്ച റെക്കോർഡ് പോരാട്ടത്തിൽ അഡ്ലെയ്ഡിന് വേണ്ടി ബ്രൈസ് കോട്ടണും 35 പോയിന്റുകൾ നേടി മികച്ച പ്രകടനം കാഴ്ചവെച്ചു.
മത്സരത്തിന്റെ നാലാം പാദത്തിന്റെ അവസാന മിനിറ്റുകളിൽ ആറ് പോയിന്റിന് മുന്നിലായിരുന്ന അഡ്ലെയ്ഡിനെ, ഡേവിസും ടിം സോറസും ചേർന്ന് സമനിലയിൽ തളയ്ക്കുകയായിരുന്നു. തുടർന്ന് നടന്ന അധിക സമയത്ത് ഡേവിസിന്റെയും മകുവാച്ച് മലുവാച്ചിന്റെയും തകർപ്പൻ പ്രകടനമാണ് സിഡ്നി കിംഗ്സിന് വിജയം ഉറപ്പാക്കിയത്. അവസാന നിമിഷം വരെ ആവേശം നിറഞ്ഞ പോരാട്ടത്തിനൊടുവിൽ സിഡ്നി കിരീടത്തിൽ മുത്തമിടുകയായിരുന്നു.
