മലപ്പുറം: തൃണമൂൽ കോൺഗ്രസുമായുള്ള എല്ലാ ബന്ധങ്ങളും അവസാനിപ്പിച്ചതായി പി.വി. അൻവർ. എറണാകുളത്ത് ചേർന്ന സംസ്ഥാന കമ്മിറ്റി യോഗത്തിന് ശേഷമാണ് തൃണമൂൽ കോൺഗ്രസ് വിടാനുള്ള തീരുമാനം അദ്ദേഹം ഔദ്യോഗികമായി അറിയിച്ചത്. ദേശീയ നേതൃത്വത്തിൽ നിന്ന് പ്രതീക്ഷിച്ച പിന്തുണ ലഭിക്കാത്ത സാഹചര്യത്തിലാണ് ഈ നീക്കമെന്ന് അദ്ദേഹം വ്യക്തമാക്കി. തൃണമൂൽ കോൺഗ്രസ് സംസ്ഥാന കൺവീനർ സ്ഥാനം അദ്ദേഹം രാജിവെച്ചു.
കേരളത്തിൽ മെയ് 15-ഓടെ മതേതര, ജനാധിപത്യ മൂല്യങ്ങൾ ഉയർത്തിപ്പിടിക്കുന്ന പുതിയ രാഷ്ട്രീയ പാർട്ടി രൂപീകരിക്കുമെന്ന് അൻവർ അറിയിച്ചു. 2026-ലെ നിയമസഭാ തിരഞ്ഞെടുപ്പിൽ ബേപ്പൂർ മണ്ഡലത്തിൽ യു.ഡി.എഫ് സ്വതന്ത്ര സ്ഥാനാർത്ഥിയായി മത്സരിക്കാൻ കോൺഗ്രസ് നേതൃത്വം അൻവറിന് നേരത്തെ തന്നെ പച്ചക്കൊടി നൽകിയിരുന്നു. പുതിയ പാർട്ടി രൂപീകരിക്കുന്നതോടെ യു.ഡി.എഫുമായി സഹകരിച്ച് പ്രവർത്തിക്കാനാണ് അദ്ദേഹത്തിൻ്റെ നീക്കം.
മുഖ്യമന്ത്രി പിണറായി വിജയനുമായും ഇടതുമുന്നണിയുമായും പിരിഞ്ഞ ശേഷം ‘ഡെമോക്രാറ്റിക് മൂവ്മെൻ്റ് ഓഫ് കേരള’ (DMK) എന്ന സംഘടന രൂപീകരിച്ചിരുന്നുവെങ്കിലും പിന്നീട് അത് തൃണമൂൽ കോൺഗ്രസിൽ ലയിപ്പിക്കുകയായിരുന്നു. എന്നാൽ തൃണമൂൽ കോൺഗ്രസിൻ്റെ ഭാഗമായി മുന്നോട്ട് പോകുന്നതിൽ പ്രായോഗിക തടസ്സങ്ങൾ ഉണ്ടെന്ന് അൻവർ ചൂണ്ടിക്കാട്ടി. ബേപ്പൂരിൽ മന്ത്രി മുഹമ്മദ് റിയാസിനെതിരെ ശക്തമായ പോരാട്ടത്തിനൊരുങ്ങുന്ന അൻവറിന് പുതിയ പാർട്ടി പ്രഖ്യാപനം നിർണ്ണായകമാകും. വരും ദിവസങ്ങളിൽ പാർട്ടിയുടെ പേരും കൊടിയും ഉൾപ്പെടെയുള്ള ഔദ്യോഗിക വിവരങ്ങൾ പുറത്തുവിടുമെന്നും അദ്ദേഹം കൂട്ടിച്ചേർത്തു.
