ബ്രിസ്ബേൺ: ഓസ്ട്രേലിയയിലെ പാർപ്പിട പ്രതിസന്ധി അതീവ ഗുരുതരമായ സാഹചര്യത്തിലേക്ക് നീങ്ങുന്നതിന്റെ നേർക്കാഴ്ചയായി ബ്രിസ്ബേണിന് വടക്കുള്ള റെഡ്ക്ലിഫിലെ താൽക്കാലിക ക്യാമ്പുകൾ. വർഷങ്ങളോളം രാജ്യത്തിന് വേണ്ടി സേവനമനുഷ്ഠിച്ച മുൻ എമർജൻസി റെസ്പോണ്ടർമാരും എസ്.ഇ.എസ് (SES) വളണ്ടിയർമാരും പോലും ഇന്ന് തലചായ്ക്കാൻ ഒരിടമില്ലാതെ ടെന്റുകളിലും തെരുവുകളിലും കഴിയേണ്ടി വരുന്ന ദുരവസ്ഥയാണ് പുറത്തുവരുന്നത്. വിരമിച്ച വളണ്ടിയറായ 66 വയസ്സുകാരി ഡെസ്ലിയും സഹോദരൻ കോളിനും മാസങ്ങളായി റെഡ്ക്ലിഫിലെ ടെന്റ് ക്യാമ്പിലാണ് താമസം.
റെഡ്ക്ലിഫിലെ ഒരു ടെന്നീസ് കോർട്ട് കേന്ദ്രീകരിച്ചാണ് ഇപ്പോൾ വലിയൊരു അഭയാർത്ഥി ക്യാമ്പ് രൂപപ്പെട്ടിരിക്കുന്നത്. ഏതാനും ടെന്റുകളിൽ തുടങ്ങിയ ഈ ക്യാമ്പ് ഇന്ന് കുട്ടികളും ജോലിയുള്ള മാതാപിതാക്കളും ഉൾപ്പെടെ നിരവധി കുടുംബങ്ങളുടെ ആശ്രയ കേന്ദ്രമായി മാറിയിരിക്കുന്നു. ഇവിടത്തെ ടെന്റുകളിൽ കഴിയുന്ന കുട്ടികൾ അവിടെ നിന്നാണ് സ്കൂളുകളിൽ പോകുന്നത്. തനിക്ക് ഓർമ്മയുള്ള കാലം മുതൽ ഒരിക്കൽ പോലും ഭവനരഹിതയായി കഴിയേണ്ടി വന്നിട്ടില്ലെന്നും, എന്നാൽ 66-ാം വയസ്സിൽ തെരുവിലിറങ്ങേണ്ടി വന്നത് വിശ്വസിക്കാനാവുന്നില്ലെന്നും ഡെസ്ലി കണ്ണീരോടെ പറയുന്നു. തന്നെക്കാൾ പ്രായമുള്ളവർ പോലും കാറുകളിൽ അന്തിയുറങ്ങുന്ന കാഴ്ച കാണുമ്പോൾ ആരും തങ്ങളെ സഹായിക്കാനില്ലേ എന്ന ചോദ്യമാണ് ഇവർ ഉയർത്തുന്നത്.
ക്വീൻസ്ലൻഡിന്റെ വിവിധ ഭാഗങ്ങളിൽ സമാനമായ രീതിയിലുള്ള താൽക്കാലിക താമസ കേന്ദ്രങ്ങൾ വർദ്ധിച്ചു വരികയാണെന്ന് സന്നദ്ധ സംഘടനകൾ മുന്നറിയിപ്പ് നൽകുന്നു. വാടക വർദ്ധനവും വീടുകളുടെ ലഭ്യതക്കുറവുമാണ് സാധാരണക്കാരെയും പെൻഷൻകാരെയും തെരുവിലേക്ക് തള്ളിവിടുന്നത്. പലർക്കും ജോലിയുണ്ടെങ്കിൽ പോലും താങ്ങാനാവുന്ന വാടകയ്ക്ക് വീടുകൾ ലഭിക്കാത്ത അവസ്ഥയാണ്. സർക്കാർ അടിയന്തരമായി ഇടപെട്ടില്ലെങ്കിൽ വരും മാസങ്ങളിൽ സ്ഥിതി കൂടുതൽ വഷളാകുമെന്നാണ് വിലയിരുത്തപ്പെടുന്നത്. സമൂഹത്തിന്റെ സുരക്ഷയ്ക്കായി ജീവിതം മാറ്റിവെച്ചവർക്ക് പോലും വാർദ്ധക്യകാലത്ത് സുരക്ഷിതമായ ഒരു വീട് ഉറപ്പാക്കാൻ കഴിയാത്തത് വലിയ പ്രതിഷേധങ്ങൾക്ക് കാരണമാകുന്നുണ്ട്.
