ബെയ്ജിംഗ്: ചൈനയുടെ തലസ്ഥാനമായ ബെയ്ജിംഗിൽ ഡ്രോണുകളുടെ വിൽപ്പന നിരോധിച്ചുകൊണ്ടുള്ള പുതിയ നിയമം വെള്ളിയാഴ്ച മുതൽ പ്രാബല്യത്തിൽ വന്നു. സുരക്ഷാ ക്രമീകരണങ്ങൾ കർശനമാക്കുന്നതിന്റെ ഭാഗമായാണ് ചൈനീസ് ഭരണകൂടം പുതിയ നിയന്ത്രണങ്ങൾ ഏർപ്പെടുത്തിയിരിക്കുന്നത്. പുതിയ നിയമപ്രകാരം നഗരപരിധിയിൽ ഡ്രോണുകൾ വിൽക്കാൻ പാടില്ലെന്ന് മാത്രമല്ല, ഡ്രോണുകൾ പറത്തുന്നതിന് മുൻകൂട്ടി പ്രത്യേക അനുമതി വാങ്ങുന്നതും നിർബന്ധമാക്കിയിട്ടുണ്ട്.
ദേശീയ സുരക്ഷയ്ക്കും പൊതുസുരക്ഷയ്ക്കും ഡ്രോണുകൾ ഭീഷണിയാകാൻ സാധ്യതയുണ്ടെന്ന വിലയിരുത്തലിനെത്തുടർന്നാണ് നടപടി. ബെയ്ജിംഗിലെ ഡ്രോൺ പറത്തലുമായി ബന്ധപ്പെട്ട നിയമങ്ങൾ ലംഘിക്കുന്നവർക്കെതിരെ കർശനമായ ശിക്ഷാനടപടികൾ സ്വീകരിക്കുമെന്ന് അധികൃതർ മുന്നറിയിപ്പ് നൽകി. ഡ്രോണുകളുടെ ഉപയോഗം വർദ്ധിച്ചുവരുന്ന സാഹചര്യത്തിൽ വ്യോമപാതയിലെ സുരക്ഷ ഉറപ്പാക്കാനാണ് ഈ നീക്കമെന്ന് സർക്കാർ വൃത്തങ്ങൾ വ്യക്തമാക്കി. ലോകമെമ്പാടുമുള്ള ഡ്രോൺ നിർമ്മാതാക്കൾക്കും വിപണിക്കും ചൈനയുടെ ഈ പുതിയ തീരുമാനം വലിയ പ്രത്യാഘാതങ്ങൾ ഉണ്ടാക്കുമെന്നാണ് വിലയിരുത്തപ്പെടുന്നത്.
