ശബരിമല: ഇടവമാസ പൂജകൾക്കായി ശബരിമല ശ്രീധർമ്മശാസ്താ ക്ഷേത്രനട തുറന്നു. ഇന്നലെ വൈകുന്നേരം ക്ഷേത്ര തന്ത്രി കണ്ഠരര് രാജീവരരുടെ മുഖ്യകാർമ്മികത്വത്തിൽ മേൽശാന്തി പി.എൻ. മഹേഷ് നമ്പൂതിരിയാണ് ശ്രീകോവിൽ നട തുറന്ന് ദീപങ്ങൾ തെളിച്ചത്.
ഇന്ന് പുലർച്ചെ അഞ്ച് മണി മുതൽ ഭക്തർക്ക് ദർശനം അനുവദിച്ചു തുടങ്ങിയിട്ടുണ്ട്. മെയ് 19 രാത്രി 10 മണി വരെയാണ് ഭക്തർക്ക് ദർശനത്തിന് സൗകര്യമുണ്ടാവുക. മാസപൂജയുടെ ഭാഗമായി നട തുറന്നിരിക്കുന്ന ദിവസങ്ങളിൽ പതിവ് പൂജകൾക്ക് പുറമെ നെയ്യഭിഷേകം, ഉദയാസ്തമന പൂജ, പടിപൂജ, കളഭാഭിഷേകം തുടങ്ങിയ പ്രത്യേക ചടങ്ങുകളും നടക്കും.
തീർത്ഥാടകരുടെ തിരക്ക് നിയന്ത്രിക്കുന്നതിനായി ഓൺലൈൻ വഴിയുള്ള വെർച്വൽ ക്യൂ ബുക്കിംഗ് സൗകര്യം ഏർപ്പെടുത്തിയിട്ടുണ്ട്. സ്പോട്ട് ബുക്കിംഗ് കൗണ്ടറുകൾ വഴിയും ഭക്തർക്ക് ദർശനത്തിനുള്ള അനുമതി ലഭിക്കും. വേനൽ ചൂട് കണക്കിലെടുത്ത് ഭക്തർക്കായി പമ്പയിലും സന്നിധാനത്തും ആവശ്യമായ കുടിവെള്ള സജ്ജീകരണങ്ങളും വിശ്രമ സൗകര്യങ്ങളും ദേവസ്വം ബോർഡ് ഒരുക്കിയിട്ടുണ്ട്. ഇടവമാസ പൂജകൾ പൂർത്തിയാക്കി മെയ് 19-ന് രാത്രി 10 മണിക്ക് ഹരിവരാസനം പാടി നട അടയ്ക്കും
