ഇസ്ലാമാബാദ്: നിലച്ചുപോയ ഇറാൻ-അമേരിക്ക സമാധാന ചർച്ചകൾ വീണ്ടും ആരംഭിക്കാൻ പാകിസ്ഥാൻ പുതിയ നയതന്ത്ര ഇടപെടൽ ശക്തമാക്കി. പാക് ആഭ്യന്തര മന്ത്രി മൊഹ്സിൻ നഖ്വി ടെഹ്റാനിലെത്തി ഇറാൻ നേതാക്കളുമായി കൂടിക്കാഴ്ച നടത്തുന്നതായാണ് റിപ്പോർട്ട്.
അമേരിക്കൻ നിർദേശങ്ങളോടുള്ള ഇറാന്റെ പുതിയ പ്രതികരണം യു.എസ് പ്രസിഡന്റ് ഡോണൾഡ് ട്രംപ് തള്ളിയതിന് പിന്നാലെയാണ് പാകിസ്ഥാന്റെ ഇടപെടൽ ശക്തമായത്. സമാധാന ശ്രമങ്ങൾ പുനരുജ്ജീവിപ്പിക്കാനും മേഖലയിലെ സംഘർഷാവസ്ഥ കുറയ്ക്കാനുമാണ് ഇസ്ലാമാബാദ് ശ്രമിക്കുന്നതെന്ന് നയതന്ത്ര വൃത്തങ്ങൾ അറിയിച്ചു. ഇറാനുമായി അമേരിക്കയ്ക്ക് വിശ്വാസബന്ധമില്ലെന്നും വൈരുധ്യമാർന്ന സന്ദേശങ്ങളാണ് വാഷിങ്ടണിൽ നിന്ന് ലഭിക്കുന്നതെന്നും ഇറാൻ വിദേശകാര്യമന്ത്രി അബ്ബാസ് അറാഘ്ചി പ്രതികരിച്ചു. എന്നാൽ ചർച്ചകൾ തുടരാൻ അമേരിക്ക താൽപര്യം പ്രകടിപ്പിച്ചിട്ടുണ്ടെന്നും അദ്ദേഹം വ്യക്തമാക്കി.
2026-ലെ ഇറാൻ-അമേരിക്ക സംഘർഷത്തിന് പിന്നാലെ ഇരുരാജ്യങ്ങൾക്കുമിടയിലെ വെടിനിർത്തൽ കരാർ നടപ്പാക്കുന്നതിലും സമാധാന ചർച്ചകൾക്ക് വേദിയൊരുക്കുന്നതിലും പാകിസ്ഥാൻ പ്രധാന ഇടനിലക്കാരനായിരുന്നു. ഇസ്ലാമാബാദിൽ നടന്ന ചർച്ചകൾ അന്തിമ ധാരണയില്ലാതെ അവസാനിച്ചെങ്കിലും സമാധാന ശ്രമങ്ങൾ തുടരുകയാണെന്ന് റിപ്പോർട്ടുകൾ വ്യക്തമാക്കുന്നു.
