സാമൂഹ്യമാധ്യമങ്ങളിൽ ശ്രദ്ധനേടുന്ന “കോക്രോച്ച് ജനതാ പാർട്ടി”യ്ക്കുള്ള ജനപിന്തുണ സർക്കാർ ഗൗരവമായി കാണണമെന്ന് ജൻ സുരാജ് പാർട്ടി സ്ഥാപകൻ പ്രശാന്ത് കിഷോർ പറഞ്ഞു. തൊഴിലില്ലായ്മ, അഴിമതി, വിലക്കയറ്റം തുടങ്ങിയ വിഷയങ്ങളിലുള്ള പൊതുജന അസന്തോഷമാണ് ഈ ഡിജിറ്റൽ പ്രചാരണത്തിന് പിന്തുണ വർധിക്കാൻ കാരണമായതെന്നും അദ്ദേഹം വ്യക്തമാക്കി. പാറ്റ്നയിൽ മാധ്യമപ്രവർത്തകരോട് സംസാരിക്കവെയാണ് പ്രശാന്ത് കിഷോർ പ്രതികരിച്ചത്.
സംഘടനാ ഘടനയോ വ്യക്തമായ നേതൃത്വമോ ഇപ്പോഴും ഇല്ലാത്ത ഒരു സാമൂഹ്യമാധ്യമ പ്രചാരണമാണെങ്കിലും വളരെ കുറഞ്ഞ സമയത്തിനുള്ളിൽ കോടിക്കണക്കിന് ആളുകൾ ഇതിനോട് ചേർന്നത് ഭരണസംവിധാനത്തോടുള്ള ജനങ്ങളുടെ ആശങ്കയുടെ സൂചനയാണെന്ന് അദ്ദേഹം പറഞ്ഞു.
ഗ്യാസ്, വളം എന്നിവയുടെ ലഭ്യതക്കുറവ്, ഉയർന്നുവരുന്ന ജീവിതച്ചെലവ്, യുവാക്കളുടെ തൊഴിൽപ്രശ്നങ്ങൾ തുടങ്ങിയ വിഷയങ്ങളാണ് ജനങ്ങളെ ഇത്തരം പ്രചാരണങ്ങളിലേക്ക് ആകർഷിക്കുന്നതെന്നും അദ്ദേഹം ചൂണ്ടിക്കാട്ടി. 2029ലെ പൊതുതെരഞ്ഞെടുപ്പിൽ ഇത് സ്വാധീനം ചെലുത്തുമോയെന്ന് ഇപ്പോൾ പറയാനാകില്ലെങ്കിലും ഭരണകൂടം ഈ പ്രതികരണം അവഗണിക്കരുതെന്നും പ്രശാന്ത് കിഷോർ പറഞ്ഞു.
