2024-ലെ ലോക്സഭാ തിരഞ്ഞെടുപ്പിനിടെ വടകരയിൽ വലിയ രാഷ്ട്രീയ വിവാദത്തിന് ഇടയാക്കിയ ‘കാഫിർ’ സ്ക്രീൻഷോട്ട് കേസിന്റെ പുനരന്വേഷണത്തിനായി രൂപീകരിച്ച പ്രത്യേക അന്വേഷണസംഘം (SIT) ആദ്യ യോഗം ഇന്ന് ചേരും. കേസിന്റെ തുടർ അന്വേഷണത്തിന്റെ ദിശയും നടപടിക്രമങ്ങളും യോഗത്തിൽ തീരുമാനിക്കുമെന്നാണ് സൂചന.
കോഴിക്കോട് റൂറൽ എസ്പിയുടെ മേൽനോട്ടത്തിൽ ഏഴംഗ സംഘത്തെയാണ് അന്വേഷണത്തിനായി നിയോഗിച്ചിരിക്കുന്നത്. കോഴിക്കോട് റൂറൽ ജില്ലാ ക്രൈംബ്രാഞ്ച് ഡിവൈഎസ്പി ടി. മനോഹരനാണ് അന്വേഷണ ഉദ്യോഗസ്ഥൻ. വടകര പൊലീസ് സ്റ്റേഷൻ ഹൗസ് ഓഫീസർ ഉൾപ്പെടെയുള്ള ഉദ്യോഗസ്ഥർ സംഘത്തിലുണ്ട്. കഴിഞ്ഞ ലോക്സഭാ തിരഞ്ഞെടുപ്പ് പ്രചാരണത്തിനിടെ എൽഡിഎഫ് സ്ഥാനാർഥിയായിരുന്ന കെ കെ ശൈലജക്കെതിരെ വർഗീയ പരാമർശങ്ങൾ ഉൾപ്പെട്ടതായി ആരോപിക്കപ്പെട്ട സ്ക്രീൻഷോട്ട് സമൂഹമാധ്യമങ്ങളിൽ പ്രചരിച്ചതോടെയാണ് വിവാദം ഉയർന്നത്. യുഡിഎഫ് സ്ഥാനാർഥിയായിരുന്ന ഷാഫി പറമ്പിലിനെ ലക്ഷ്യമിട്ട് വ്യാജ സ്ക്രീൻഷോട്ട് പ്രചരിപ്പിച്ചെന്ന ആരോപണവും പിന്നീട് ഉയർന്നിരുന്നു.
സംഭവം സംസ്ഥാന രാഷ്ട്രീയത്തിൽ വലിയ ചർച്ചയായി മാറിയിരുന്നു. മുൻ അന്വേഷണത്തിൽ സ്ക്രീൻഷോട്ടിന്റെ യഥാർഥ ഉറവിടമോ അത് സൃഷ്ടിച്ച വ്യക്തികളെയോ കണ്ടെത്താൻ പൊലീസിന് സാധിച്ചിരുന്നില്ല. പ്രതികളെ തിരിച്ചറിയാൻ കഴിഞ്ഞില്ലെന്ന് വ്യക്തമാക്കി പൊലീസ് കോടതിയിൽ റിപ്പോർട്ട് സമർപ്പിക്കുകയും ചെയ്തിരുന്നു. ഇതിനെതിരെ വിമർശനങ്ങൾ ഉയർന്നതിനെ തുടർന്നാണ് പുനരന്വേഷണം ആവശ്യപ്പെട്ട് പരാതി നൽകപ്പെട്ടത്.
കുറ്റ്യാടി എംഎൽഎയായ പാറക്കൽ അബ്ദുല്ല ആഭ്യന്തര മന്ത്രിക്ക് നൽകിയ പരാതിയുടെ അടിസ്ഥാനത്തിലാണ് കേസ് വീണ്ടും അന്വേഷിക്കാൻ തീരുമാനമായത്. പുതിയ സർക്കാർ അധികാരമേറ്റതിന് പിന്നാലെ ആഭ്യന്തര വകുപ്പ് പുനരന്വേഷണത്തിന് അനുമതി നൽകുകയും പ്രത്യേക അന്വേഷണസംഘം രൂപീകരിക്കുകയും ചെയ്തു. അതേസമയം, കേസിൽ സമഗ്ര അന്വേഷണം നടക്കട്ടെയെന്നും യഥാർഥ ഉത്തരവാദികൾ ആരാണെന്ന് കണ്ടെത്തണമെന്നും കെ. കെ. ശൈലജ പ്രതികരിച്ചു. പുതിയ അന്വേഷണത്തിലൂടെ സ്ക്രീൻഷോട്ട് പ്രചാരണത്തിന് പിന്നിലെ യഥാർഥ വസ്തുതകൾ പുറത്തുവരുമെന്ന പ്രതീക്ഷയാണ് വിവിധ രാഷ്ട്രീയ കക്ഷികൾ പ്രകടിപ്പിക്കുന്നത്.
