നിയാമി: നൈജറിലെ സഹാറ മരുഭൂമിയിൽ യാത്രയ്ക്കിടെ ലോറി തകരാറിലായതിനെ തുടർന്ന് കുടിവെള്ളമില്ലാതെ കുടുങ്ങിയ 49 പേർ ദാഹിച്ച് മരിച്ചു. നൈജറിന്റെ വടക്കൻ അഗദെസ് (Agadez) മേഖലയിലെ അസമാക്ക (Assamaka) പട്ടണത്തിൽ നിന്ന് ഏകദേശം 80 കിലോമീറ്റർ അകലെയായിരുന്നു ദുരന്തമെന്ന് പ്രാദേശിക ഭരണകൂടം അറിയിച്ചു.
മരിച്ചവരെല്ലാം നൈജർ പൗരന്മാരാണ്. അയൽരാജ്യമായ മാലിയിൽ നടന്ന മതപരമായ ആഘോഷത്തിൽ പങ്കെടുത്ത ശേഷം സ്വന്തം നാട്ടിലേക്ക് മടങ്ങുന്നതിനിടെയാണ് ലോറി മരുഭൂമിയിൽ തകരാറിലായത്. വാഹനം നന്നാക്കാനുള്ള ശ്രമങ്ങൾ പരാജയപ്പെട്ടതോടെ യാത്രക്കാർ അതിശക്തമായ ചൂടിലും വെള്ളത്തിന്റെ അഭാവത്തിലും കുടുങ്ങിപ്പോയി. സംഭവത്തിൽ രണ്ട് പേർ മാത്രമാണ് രക്ഷപ്പെട്ടത്.
ഇവർ 50 കിലോമീറ്ററിലധികം ദൂരം നടന്ന് ഒരു ജലസ്രോതസിലെത്തി പിന്നീട് അസമാക്കയിൽ എത്തി അധികൃതരെ വിവരം അറിയിക്കുകയായിരുന്നു. തുടർന്ന് രക്ഷാപ്രവർത്തകർ സ്ഥലത്തെത്തിയപ്പോഴാണ് ലോറിയുടെ അടിയിലും സമീപ പ്രദേശങ്ങളിലുമായി നിരവധി മൃതദേഹങ്ങൾ കണ്ടെത്തിയത്. മാലിയിലെ തൽഹാൻഡെക് (Talhandek) മേഖലയിൽ നിന്ന് ദിവസങ്ങളോളം യാത്ര ചെയ്ത ശേഷമാണ് വാഹനം നൈജർ അതിർത്തിക്ക് സമീപം തകരാറിലായതെന്ന് അന്വേഷണത്തിൽ കണ്ടെത്തി.
ലോറി എങ്ങനെ തകരാറിലായെന്നത് വ്യക്തമല്ല. മൃതദേഹങ്ങൾ സംഭവസ്ഥലത്ത് തന്നെ കൂട്ടക്കുഴിമാടങ്ങളിൽ സംസ്കരിച്ചു. രക്ഷാപ്രവർത്തനത്തിനിടെ മറ്റൊരു തകരാറിലായ ലോറിയിൽ മൂന്ന് ദിവസമായി കുടുങ്ങിക്കിടന്ന 60-ലധികം ആളുകളെയും കണ്ടെത്തി സുരക്ഷിതമായി രക്ഷപ്പെടുത്തിയതായി അധികൃതർ അറിയിച്ചു. സഹാറ മരുഭൂമിയിലൂടെ കടന്നുപോകുന്ന യാത്രാമാർഗങ്ങൾ അത്യന്തം അപകടകരമാണെന്നും അതിശക്തമായ ചൂടും വെള്ളത്തിന്റെ ലഭ്യതക്കുറവും കാരണം ഇത്തരം ദുരന്തങ്ങൾ ആവർത്തിക്കപ്പെടാറുണ്ടെന്നും അന്താരാഷ്ട്ര സംഘടനകൾ ചൂണ്ടിക്കാട്ടുന്നു.
