ഇറാൻ യുറേനിയം സമ്പുഷ്ടീകരണം നിർത്തിയെന്ന് സ്ഥിരീകരിക്കാനാകില്ലെന്ന് ഐഎഇഎ
വിയന്ന: യുറേനിയം സമ്പുഷ്ടീകരണ പ്രവർത്തനങ്ങൾ (uranium enrichment) നിർത്തിവച്ചെന്ന ഇറാന്റെ അവകാശവാദം സ്ഥിരീകരിക്കാൻ കഴിയില്ലെന്ന് അന്താരാഷ്ട്ര ആണവോർജ ഏജൻസി (IAEA) അറിയിച്ചു. ഇറാനിലെ പ്രധാന ആണവ കേന്ദ്രങ്ങളിൽ പരിശോധന നടത്താൻ കഴിയാത്ത സാഹചര്യത്തിലാണ് ഐഎഇഎയുടെ നിലപാട്.
ഐഎഇഎ അംഗരാജ്യങ്ങൾക്ക് കൈമാറിയ രഹസ്യ റിപ്പോർട്ടിൽ, ഇറാന്റെ സമ്പുഷ്ടീകരിച്ച യുറേനിയം ശേഖരത്തിന്റെ നിലവിലെ അളവ്, ഘടന, സ്ഥാനം എന്നിവയെക്കുറിച്ച് വിവരങ്ങൾ നൽകാൻ കഴിയില്ലെന്നും, സമ്പുഷ്ടീകരണവുമായി ബന്ധപ്പെട്ട എല്ലാ പ്രവർത്തനങ്ങളും നിർത്തിയിട്ടുണ്ടോയെന്ന് സ്ഥിരീകരിക്കാനാവില്ലെന്നും വ്യക്തമാക്കുന്നു. ഇസ്രായേലും അമേരിക്കയും നടത്തിയ ആക്രമണങ്ങൾക്ക് ശേഷം ഇറാനിലെ ചില ആണവ കേന്ദ്രങ്ങളിലേക്ക് ഐഎഇഎ പരിശോധനാ സംഘങ്ങൾക്ക് പ്രവേശനം ലഭിച്ചിട്ടില്ല. അതിനാൽ അവിടെയുള്ള യുറേനിയം ശേഖരങ്ങളെയും ആണവ പ്രവർത്തനങ്ങളെയും കുറിച്ചുള്ള സ്വതന്ത്ര പരിശോധനകൾ നടത്താൻ ഏജൻസിക്ക് സാധിക്കുന്നില്ല.
ആണവായുധ നിർമാണ ലക്ഷ്യമില്ലെന്നും തങ്ങളുടെ ആണവ പദ്ധതി സമാധാനപരമായ ആവശ്യങ്ങൾക്കായുള്ളതാണെന്നും ഇറാൻ ആവർത്തിച്ച് വ്യക്തമാക്കിയിട്ടുണ്ട്. എന്നാൽ ആവശ്യമായ പരിശോധനാ സൗകര്യങ്ങൾ ലഭ്യമല്ലാത്തതിനാൽ ഇറാന്റെ അവകാശവാദങ്ങൾ സ്ഥിരീകരിക്കാനോ തള്ളിക്കളയാനോ കഴിയില്ലെന്നാണ് ഐഎഇഎ വ്യക്തമാക്കുന്നത്.
ഇറാന്റെ ആണവ പദ്ധതിയെക്കുറിച്ചുള്ള ഈ അനിശ്ചിതത്വം വരാനിരിക്കുന്ന ഐഎഇഎ ബോർഡ് ഓഫ് ഗവേണേഴ്സ് യോഗത്തിൽ പ്രധാന ചർച്ചാ വിഷയമാകുമെന്നാണ് നയതന്ത്ര വൃത്തങ്ങൾ സൂചിപ്പിക്കുന്നത്. അതേസമയം, ആണവ വ്യാപന നിരോധന ഉടമ്പടിക്ക് (NPT) കീഴിലുള്ള ബാധ്യതകൾ പൂർണമായി നടപ്പാക്കാൻ ഇറാൻ സഹകരിക്കണമെന്ന് ഐഎഇഎ ആവശ്യപ്പെട്ടു.
