ഓസ്ലോ: നോർവേ ചെസ്സ് ടൂർണമെന്റിൽ ചരിത്ര വിജയം സ്വന്തമാക്കി ഇന്ത്യൻ ഗ്രാൻഡ്മാസ്റ്റർ ആർ. പ്രഗ്നാനന്ദ. ഫൈനൽ റൗണ്ടിൽ ജർമ്മനിയുടെ വിൻസെന്റ് കീമറെ പരാജയപ്പെടുത്തിയാണ് ഓസ്ലോയിൽ വെച്ച് പ്രഗ്നാനന്ദ കിരീടം ചൂടിയത്. ഈ അഭിമാന നേട്ടം കൈവരിക്കുന്ന ആദ്യ ഇന്ത്യൻ താരം എന്ന റെക്കോർഡും ഇതോടെ പ്രഗ്നാനന്ദ സ്വന്തം പേരിലാക്കി.
ടൂർണമെന്റിന്റെ അവസാന ദിനം മൂന്നാം സ്ഥാനത്തോടെയാണ് ചെന്നൈയിൽ നിന്നുള്ള ഈ ഇരുപതുകാരൻ മത്സരം ആരംഭിച്ചത്. എന്നാൽ നിർണ്ണായകമായ ക്ലാസിക്കൽ റൗണ്ടിൽ വിജയം വരിച്ചതോടെ മൂന്ന് പോയിന്റുകൾ കൂടി അക്കൗണ്ടിലാക്കാൻ പ്രഗ്നാനന്ദയ്ക്കായി. ഇതോടെ ആകെ 18 പോയിന്റുകൾ നേടിക്കൊണ്ടാണ് താരം കിരീടമുറപ്പിച്ചത്.
2013-ൽ നോർവേ ചെസ്സ് ടൂർണമെന്റ് ആരംഭിച്ചതിന് ശേഷം ഇന്ത്യൻ ചെസ്സ് ഇതിഹാസം വിശ്വനാഥൻ ആനന്ദിനോ, നിലവിലെ ലോക ചാമ്പ്യൻ ഡി. ഗുകേഷിനോ പോലും സ്വന്തമാക്കാൻ കഴിയാതിരുന്ന അപൂർവ്വ നേട്ടമാണ് പ്രഗ്നാനന്ദ ഇപ്പോൾ രാജ്യത്തിന് സമ്മാനിച്ചിരിക്കുന്നത്.
