മുംബൈ: വിദേശ പോർട്ട്ഫോളിയോ നിക്ഷേപകർക്ക് (FPI) സർക്കാർ ബോണ്ടുകളിൽ (Government Securities) നിക്ഷേപം നടത്തുന്നതിനുള്ള ചട്ടങ്ങൾ റിസർവ് ബാങ്ക് ഓഫ് ഇന്ത്യ ലളിതമാക്കി. വിദേശ നിക്ഷേപകർക്ക് ഇന്ത്യയിലെ നിക്ഷേപ നടപടികൾ കൂടുതൽ എളുപ്പമാക്കുന്നതിനും ചട്ടങ്ങൾ പാലിക്കുന്നതിലെ സങ്കീർണ്ണതകൾ കുറയ്ക്കുന്നതിനും ലക്ഷ്യമിട്ടാണ് ഈ പരിഷ്കാരം.
പുതുക്കിയ ചട്ടപ്രകാരം ‘ജനറൽ റൂട്ട്’ വഴി നിക്ഷേപം നടത്തുന്ന വിദേശ പോർട്ട്ഫോളിയോ നിക്ഷേപകർക്ക് കൂടുതൽ ഇളവുകൾ ലഭിക്കും. ഇതിന്റെ ഭാഗമായി മുൻപുണ്ടായിരുന്ന ചില നിക്ഷേപ നിയന്ത്രണങ്ങൾ ആർ.ബി.ഐ നീക്കം ചെയ്തു. കൂടാതെ, സർക്കാർ ബോണ്ടുകൾക്കും സംസ്ഥാന സർക്കാർ ബോണ്ടുകൾക്കുമായി നിലവിലുണ്ടായിരുന്ന ‘ജനറൽ’, ‘ലോങ് ടേം’ (ദീർഘകാല) നിക്ഷേപ വിഭാഗങ്ങളെ ലയിപ്പിച്ച് ഒരൊറ്റ പരിധിയാക്കി മാറ്റുകയും ചെയ്തിട്ടുണ്ട്.
2026-27 സാമ്പത്തിക വർഷത്തെ പുതുക്കിയ നിക്ഷേപ പരിധിയും റിസർവ് ബാങ്ക് പ്രഖ്യാപിച്ചു. ഇതനുസരിച്ച് കേന്ദ്ര സർക്കാർ ബോണ്ടുകളിലെ വിദേശ നിക്ഷേപ പരിധി സാമ്പത്തിക വർഷത്തിന്റെ ആദ്യ പകുതിയിൽ 4,62,490 കോടി രൂപയായും രണ്ടാം പകുതിയിൽ 4,77,006 കോടി രൂപയായും നിശ്ചയിച്ചു. സംസ്ഥാന സർക്കാർ ബോണ്ടുകളിലെ നിക്ഷേപ പരിധി യഥാക്രമം ആദ്യ പകുതിയിൽ 1,53,043 കോടി രൂപയും രണ്ടാം പകുതിയിൽ 1,64,242 കോടി രൂപയുമാണ്. പുതുക്കിയ നിർദ്ദേശങ്ങൾ ഉടനടി പ്രാബല്യത്തിൽ വന്നതായും റിസർവ് ബാങ്ക് അറിയിച്ചു
