ലിസ്ബൺ: പോർച്ചുഗീസ് ഫുട്ബോൾ താരം ക്രിസ്റ്റ്യാനോ റൊണാൾഡോയും ദീർഘകാല പങ്കാളി ജോർജിന റോഡ്രിഗസും വിവാഹിതരായി. പോർച്ചുഗലിലെ കാസ്കായിസിൽ ചൊവ്വാഴ്ച സ്വകാര്യ സിവിൽ ചടങ്ങിലായിരുന്നു വിവാഹം. റൊണാൾഡോയുടെ മാനേജ്മെന്റ് സംഘമാണ് വിവാഹവാർത്ത സ്ഥിരീകരിച്ചത്.
41കാരനായ റൊണാൾഡോയും 32കാരിയായ ജോർജിനയും 2016 മുതൽ ബന്ധത്തിലായിരുന്നു. വിവാഹച്ചടങ്ങിൽ ദമ്പതികളുടെ അഞ്ച് മക്കളും പങ്കെടുത്തു. വിവാഹശേഷം റൊണാൾഡോ വിവാഹമോതിരങ്ങളണിഞ്ഞ ഇരുവരുടെയും കൈകളുടെ ചിത്രം ഇൻസ്റ്റഗ്രാമിൽ പങ്കുവെച്ച് ‘C❤️G’ എന്ന കുറിപ്പും നൽകി.
2025 ഓഗസ്റ്റ് 11നാണ് ജോർജിന വിവാഹനിശ്ചയം പ്രഖ്യാപിച്ചത്. വിവാഹവേദിയെക്കുറിച്ച് പോർച്ചുഗീസ് മാധ്യമങ്ങളിൽ ദിവസങ്ങളായി അഭ്യൂഹങ്ങൾ നിലനിന്നിരുന്നു. റൊണാൾഡോയുടെ ജന്മനാടായ മദെയ്റയിലെ ഫുൻഷാലും ലിസ്ബണിന് സമീപമുള്ള സിന്ട്രയും വേദികളായി റിപ്പോർട്ടുകളുണ്ടായിരുന്നെങ്കിലും ഒടുവിൽ കാസ്കായിസാണ് തിരഞ്ഞെടുത്തത്. അവിടെ ദമ്പതികൾക്ക് ഒരു വില്ലയുണ്ട്.
മാഞ്ചസ്റ്റർ യുണൈറ്റഡ്, റയൽ മാഡ്രിഡ്, യുവന്റസ് എന്നീ ക്ലബുകൾക്കായി കളിച്ചിട്ടുള്ള റൊണാൾഡോ നിലവിൽ സൗദി അറേബ്യൻ ക്ലബ് അൽ-നസ്റിന്റെ താരമാണ്. അഞ്ച് തവണ ബാലൺ ഡി ഓർ നേടിയ താരം 2026 ലോകകപ്പിൽ പോർച്ചുഗലിനായി കളിച്ചിരുന്നു.
