സിഡ്നി: ഓസ്ട്രേലിയയിൽ അനുദിനം വർദ്ധിച്ചുവരുന്ന ജീവിതച്ചെലവും കടുത്ത സാമ്പത്തിക സമ്മർദ്ദവും മൂലം തങ്ങളുടെ അഞ്ചംഗ കുടുംബത്തെ മലേഷ്യയിലേക്ക് മാറ്റിപ്പാർപ്പിച്ച് ഓസ്ട്രേലിയൻ ദമ്പതികൾ. ഓസ്ട്രേലിയയിലെ സൺഷൈൻ കോസ്റ്റിൽ (Sunshine Coast) താമസിച്ചിരുന്ന പീറ്റർ ജോൺസ് (44), ശാന്തൽ ജോൺസ് (40) എന്നിവരാണ് തങ്ങളുടെ മൂന്ന് മക്കളോടൊപ്പം രാജ്യം വിടാൻ തീരുമാനിച്ചത്.ഓസ്ട്രേലിയയിൽ എത്ര കഠിനാധ്വാനം ചെയ്തിട്ടും സാമ്പത്തികമായി മുന്നേറാൻ സാധിക്കാത്ത സാഹചര്യത്തിലാണ് രാജ്യം വിടാൻ തീരുമാനിച്ചതെന്ന് പീറ്റർ വ്യക്തമാക്കുന്നു. “ഞങ്ങൾ കൂടുതൽ കഠിനമായി ജോലി ചെയ്യുകയായിരുന്നു, എന്നാൽ സാമ്പത്തികമായി പുറകോട്ടാണ് പോയത്. ഈ അവസ്ഥ മാറ്റേണ്ടതുണ്ടായിരുന്നു, ഇല്ലെങ്കിൽ ഞങ്ങൾക്ക് എല്ലാം നഷ്ടപ്പെടുമായിരുന്നു,” പീറ്റർ പറഞ്ഞു. തലചായ്ക്കാൻ ഒരു മേൽക്കൂര നിലനിർത്താൻ വേണ്ടി മാത്രം ആളുകൾ കൂടുതൽ സമയം കഠിനാധ്വാനം ചെയ്യുകയാണെന്നും എന്നാൽ ജീവിതം ആസ്വദിക്കാൻ അവർക്ക് സാധിക്കുന്നില്ലെന്നും അദ്ദേഹം കൂട്ടിച്ചേർത്തു.കഴിഞ്ഞ 2025 നവംബർ മാസമാണ് തങ്ങളുടെ സാമ്പത്തിക സ്ഥിതി ഒരു ‘ടൈം ബോംബ്’ പോലെയാണെന്ന് ഇവർ തിരിച്ചറിഞ്ഞത്. തുടർന്ന് ഓസ്ട്രേലിയയിലെ തങ്ങളുടെ വീട് വിറ്റ ഇവർ, ആ തുക ഉപയോഗിച്ച് മലേഷ്യയിലെ പെനാങ്കിൽ നാല് കിടപ്പുമുറികളും നാല് ബാത്ത്റൂമുകളുമുള്ള ഒരു ആഡംബര അപ്പാർട്ട്മെന്റ് സ്വന്തമാക്കി.ഭക്ഷണം, വിനോദം, മറ്റ് ദൈനംദിന ചിലവുകൾ എന്നിവയ്ക്ക് ഓസ്ട്രേലിയയെ അപേക്ഷിച്ച് മലേഷ്യയിൽ മൂന്നിലൊന്ന് ചിലവ് മാത്രമേ വരുന്നുള്ളൂവെന്ന് പീറ്റർ വ്യക്തമാക്കുന്നു. നിലവിലെ തങ്ങളുടെ വരുമാനം നിലനിർത്തിക്കൊണ്ടുതന്നെ 1990-കളിലെ വിലനിലവാരമുള്ള ഒരു ലോകത്തേക്ക് മാറിയതുപോലെയാണ് ഇപ്പോൾ അനുഭവപ്പെടുന്നതെന്നും അദ്ദേഹം പറഞ്ഞു. മലേഷ്യയിൽ താമസിക്കുമ്പോഴും ഓസ്ട്രേലിയൻ കമ്പനികൾക്ക് വേണ്ടി വിദൂര ജോലി (Remote Work) തുടരാനാണ് ഈ ദമ്പതികളുടെ തീരുമാനം
ജീവിതച്ചെലവ് താങ്ങാനാവുന്നില്ല; ഓസ്ട്രേലിയ വിട്ട് മലേഷ്യയിലേക്ക് കുടിയേറി അഞ്ചംഗ കുടുംബം
