നടിയെ ആക്രമിച്ച കേസിലെ നിർണായക തെളിവായ മെമ്മറി കാർഡിലേക്കുള്ള അനധികൃത പ്രവേശനവുമായി ബന്ധപ്പെട്ട് അതിജീവിത സമർപ്പിച്ച ഹർജി കേരള ഹൈക്കോടതിയിൽ പുതിയ ബെഞ്ച് പരിഗണിക്കും.
ഈ ഹർജി മുമ്പ് പരിഗണിച്ചിരുന്ന ജസ്റ്റിസ് ജോബിൻ സെബാസ്റ്റ്യൻ കേസിൽ നിന്ന് പിന്മാറിയതിനെ തുടർന്ന് കേസ് മറ്റൊരു ബെഞ്ചിന് കൈമാറുകയായിരുന്നു. തുടർന്ന് ഹർജി ജസ്റ്റിസ് കൗസർ എടപ്പഗത്ത് ബെഞ്ചിന് മുന്നിലെത്തി. ഹർജിയിലെ പ്രാഥമിക നടപടികൾക്ക് ശേഷം അതിജീവിതയുടെ ആവശ്യങ്ങൾ അടുത്ത ഘട്ടത്തിൽ വിശദമായി പരിഗണിക്കുമെന്ന് കോടതി വ്യക്തമാക്കി. മെമ്മറി കാർഡിലുണ്ടായിരുന്ന ദൃശ്യങ്ങൾ കോടതി കസ്റ്റഡിയിലിരിക്കെ അനധികൃതമായി പലതവണ പരിശോധിക്കപ്പെട്ടുവെന്ന ഫോറൻസിക് കണ്ടെത്തലുകളുടെ പശ്ചാത്തലത്തിലാണ് അതിജീവിത ഹൈക്കോടതിയെ സമീപിച്ചത്.
അനധികൃത പ്രവേശനം, ദൃശ്യങ്ങളുടെ പകർപ്പെടുക്കൽ അല്ലെങ്കിൽ കൈമാറ്റം നടന്നിട്ടുണ്ടോയെന്ന് പ്രത്യേക അന്വേഷണസംഘം (SIT) രൂപീകരിച്ച് സമഗ്രവും കോടതി മേൽനോട്ടത്തിലുള്ളതുമായ അന്വേഷണം നടത്തണമെന്നാണ് ഹർജിയിലെ പ്രധാന ആവശ്യം. കൂടാതെ ഡിജിറ്റൽ ഫോറൻസിക് വിദഗ്ധനെ അന്വേഷണസംഘത്തിൽ ഉൾപ്പെടുത്തണമെന്നും ആവശ്യപ്പെട്ടിട്ടുണ്ട്.
മെമ്മറി കാർഡിലേക്കുള്ള പ്രവേശനം അതിജീവിതയുടെ സ്വകാര്യതയുടെയും അന്തസ്സിന്റെയും അവകാശങ്ങൾ ലംഘിച്ചതാണെന്നും നിലവിലുള്ള അന്വേഷണ റിപ്പോർട്ട് അപൂർണവും തൃപ്തികരമല്ലെന്നും ഹർജിയിൽ ആരോപിക്കുന്നു. കേസിൽ തുടർവാദം അടുത്ത ഘട്ടത്തിൽ കോടതി പരിഗണിക്കും.
