മലപ്പുറം: കുടുംബവഴക്കിനെ തുടർന്ന് മാനസിക വെല്ലുവിളി നേരിടുന്ന അമ്മ ഒൻപത് വയസുള്ള മകളെ കിണറ്റിലേക്ക് തള്ളിയിട്ട സംഭവത്തിൽ കുട്ടിയെ നാട്ടുകാരും രക്ഷാപ്രവർത്തകരും ചേർന്ന് രക്ഷപ്പെടുത്തി.
മലപ്പുറം ജില്ലയിലെ ചുങ്കത്തറ പ്രദേശത്താണ് സംഭവം. ഏകദേശം 35 റിങ്ങുകൾ ഇറക്കിയ ആഴമുള്ള കിണറ്റിലേക്കാണ് കുട്ടി വീണത്. സംഭവം ശ്രദ്ധയിൽപ്പെട്ട നാട്ടുകാർ ഉടൻ രക്ഷാപ്രവർത്തനം ആരംഭിക്കുകയും അഗ്നിരക്ഷാസേനയുടെ സഹായത്തോടെ കുട്ടിയെ പുറത്തെടുക്കുകയും ചെയ്തു. രക്ഷപ്പെടുത്തിയ കുട്ടിയെ ഉടൻ ആശുപത്രിയിലേക്ക് മാറ്റി. കുട്ടിയുടെ ആരോഗ്യനില തൃപ്തികരമാണെന്നാണ് ലഭിക്കുന്ന വിവരം.
സംഭവവുമായി ബന്ധപ്പെട്ട് പൊലീസ് അന്വേഷണം ആരംഭിച്ചിട്ടുണ്ട്. കുടുംബപ്രശ്നങ്ങളെയും അമ്മയുടെ മാനസികാവസ്ഥയെയും തുടർന്നാണ് സംഭവം ഉണ്ടായതെന്നാണ് പ്രാഥമിക വിവരം. കൂടുതൽ വിവരങ്ങൾ പൊലീസ് അന്വേഷിച്ചുവരികയാണ്.
