സിയാറ്റിൽ: 2026 ഫിഫ ലോകകപ്പിലെ ഗ്രൂപ്പ് ജി പോരാട്ടത്തിൽ ബെൽജിയത്തിനെതിരെ ഈജിപ്ത് ആദ്യം ലീഡ് നേടിയെങ്കിലും മത്സരം 1-1 സമനിലയിൽ അവസാനിച്ചു. ആദ്യ പകുതിയിൽ ഇമാം അഷൂർ നേടിയ ഗോളിലൂടെയാണ് ഈജിപ്ത് മുന്നിലെത്തിയത്. ഇത് അഷൂറിന്റെ ആദ്യ അന്താരാഷ്ട്ര ഗോളായിരുന്നു.
ആദ്യ പകുതിയിൽ നിരവധി അവസരങ്ങൾ സൃഷ്ടിച്ചിട്ടും ബെൽജിയത്തിന് സമനില കണ്ടെത്താനായില്ല. രണ്ടാം പകുതിയിൽ പകരക്കാരനായി റൊമേലു ലുകാകു ഇറങ്ങിയതോടെ മത്സരത്തിന്റെ ഗതി മാറി. ലുകാകുവിന്റെ സമ്മർദത്തിനിടെ ഈജിപ്ത് പ്രതിരോധതാരം മുഹമ്മദ് ഹാനി സ്വന്തം വലയിലേക്ക് പന്തെത്തിച്ചതോടെയാണ് ബെൽജിയം സമനില പിടിച്ചത്.
മത്സരത്തിന്റെ അവസാന ഘട്ടത്തിൽ ഇരു ടീമുകൾക്കും വിജയഗോൾ നേടാൻ അവസരങ്ങളുണ്ടായെങ്കിലും സ്കോർ മാറിയില്ല. ഇതോടെ ഗ്രൂപ്പ് ജിയിലെ ആദ്യ മത്സരത്തിൽ ബെൽജിയവും ഈജിപ്തും ഓരോ പോയിന്റ് വീതം സ്വന്തമാക്കി.
