ന്യൂഡൽഹി: പശ്ചിമേഷ്യയിലെ സംഘർഷം ലഘൂകരിക്കുന്നതിനായുള്ള അമേരിക്ക–ഇറാൻ ധാരണയ്ക്ക് പിന്നാലെ, ഹോർമുസ് കടലിടുക്ക് വഴി ഒരു ഇന്ത്യൻ ഇന്ധന ടാങ്കർ സുരക്ഷിതമായി കടന്നതായി റിപ്പോർട്ട്. ഇതോടെ ഗൾഫ് മേഖലയിലുള്ള മറ്റ് ഇന്ത്യൻ കപ്പലുകൾക്കും സുരക്ഷിത യാത്രയ്ക്ക് പ്രതീക്ഷ ശക്തമായിട്ടുണ്ട്.
പെട്രോനെറ്റ് എൽഎൻജിക്കായി ചരക്ക് കൊണ്ടുപോകുന്ന ഇന്ത്യൻ എൽഎൻജി ടാങ്കറാണ് കടലിടുക്ക് വിജയകരമായി മറികടന്നത്. സംഘർഷത്തെ തുടർന്ന് ആഴ്ചകളായി തടസ്സപ്പെട്ടിരുന്ന കപ്പൽഗതാഗതം ക്രമേണ പുനരാരംഭിക്കുന്നതിന്റെ പ്രധാന സൂചനയായാണ് ഈ യാത്രയെ വിലയിരുത്തുന്നത്.
ഹോർമുസ് കടലിടുക്കിലൂടെ ഇന്ത്യയിലേക്കുള്ള 34 കപ്പലുകൾ ഇപ്പോഴും യാത്രയ്ക്കായി കാത്തിരിക്കുകയാണെന്നും, ആദ്യ സുരക്ഷിത യാത്ര അവയ്ക്കും ആത്മവിശ്വാസം പകരുന്നുവെന്നുമാണ് റിപ്പോർട്ടുകൾ. എന്നിരുന്നാലും, മേഖലയിൽ മൈനുകൾ നീക്കം ചെയ്യുന്നതും സുരക്ഷ ഉറപ്പാക്കുന്നതും പൂർത്തിയാകുന്നതുവരെ സാധാരണ നിലയിലേക്കുള്ള കപ്പൽഗതാഗതം പൂർണമായി പുനഃസ്ഥാപിക്കാൻ ഇനിയും സമയം വേണ്ടിവരുമെന്നാണ് ഷിപ്പിംഗ് മേഖലയുടെ വിലയിരുത്തൽ.
