അമേരിക്കയിലെ മിസൗറി സംസ്ഥാനത്ത് സ്കൈഡൈവിംഗിനായി പുറപ്പെട്ട സ്വകാര്യ വിമാനം തകർന്നുവീണ് 12 പേർ മരിച്ചു. ബട്ലർ മെമ്മോറിയൽ വിമാനത്താവളത്തിൽ നിന്ന് പറന്നുയർന്നതിന് തൊട്ടുപിന്നാലെയാണ് വിമാനം നിയന്ത്രണം വിട്ട് സമീപത്തെ വയലിലേക്ക് പതിച്ച് തീപിടിച്ചത്. അപകടത്തിൽ പൈലറ്റും 11 യാത്രക്കാരും മരിച്ചു.
സ്കൈഡൈവിംഗ് സ്ഥാപനമായ സ്കൈഡൈവ് കനാസസ് സിറ്റിയുടെ പ്രവർത്തനത്തിനായി ഉപയോഗിച്ചിരുന്ന പസിഫിക് എയ്റോ സ്പേസ് 750XL എന്ന ഒറ്റ എൻജിൻ ടർബോപ്രോപ്പ് വിമാനമാണ് അപകടത്തിൽപ്പെട്ടത്. വിമാനം ഉയരം കൈവരിക്കുന്നതിനിടെ എൻജിൻ തകരാർ സംഭവിച്ചിരിക്കാമെന്നാണ് പ്രാഥമിക നിഗമനം. അടിയന്തര ലാൻഡിങ്ങിന് ശ്രമിക്കുന്നതിനിടെയാണ് വിമാനം തകർന്നുവീണ് തീപിടിച്ചതെന്ന് അധികൃതർ അറിയിച്ചു.
സംഭവത്തിൽ അമേരിക്കയുടെ ഫെഡറൽ ഏവിയേഷൻ അഡ്മിനിസ്ട്രേഷനും നാഷണൽ ട്രാൻസ്പോർട്ടേഷൻ സേഫ്റ്റി ബോർഡും ചേർന്ന് അന്വേഷണം ആരംഭിച്ചിട്ടുണ്ട്. അപകടത്തിന്റെ കൃത്യമായ കാരണം കണ്ടെത്തുന്നതിനുള്ള അന്വേഷണം തുടരുകയാണ്.
