ദോഹ: ഫിഫ ലോകകപ്പിലെ നിർണായക മത്സരത്തിൽ കോംഗോയെ പരാജയപ്പെടുത്തി കൊളംബിയ പ്രീ-ക്വാർട്ടർ യോഗ്യത നേടി. ശക്തമായ പോരാട്ടം കണ്ട മത്സരത്തിൽ ഏകപക്ഷീയമായ ഒരു ഗോളിനാണ് കൊളംബിയയുടെ വിജയം. കളിയിലുടനീളം പ്രതിരോധിച്ചുനിന്ന കോംഗോയുടെ കോട്ട തകർത്ത് 76–-ാം മിനിറ്റിലാണ് കൊളംബിയ വിജയഗോൾ കണ്ടെത്തിയത്. ഈ വിജയത്തോടെ ഗ്രൂപ്പ് ഘട്ടം കടന്ന് കൊളംബിയ നോക്കൗട്ട് റൗണ്ടിലേക്ക് മുന്നേറി.
ഗ്രൂപ്പ് കെ-യിലെ മറ്റൊരു ആവേശകരമായ മത്സരത്തിൽ ഉസ്ബെക്കിസ്ഥാനെ എതിരില്ലാത്ത അഞ്ചു ഗോളുകൾക്ക് തകർത്ത് പോർച്ചുഗൽ ടൂർണമെന്റിലെ തങ്ങളുടെ ആദ്യ ജയം സ്വന്തമാക്കി. മത്സരത്തിൽ മിന്നും പ്രകടനം പുറത്തെടുത്ത പോർച്ചുഗീസ് നായകൻ ക്രിസ്റ്റ്യാനോ റൊണാൾഡോ ഇരട്ട ഗോളുകളുമായി ടീമിന്റെ വിജയത്തിൽ നിർണായക പങ്കുവഹിച്ചു. ഈ ഗോളുകളോടെ, ആറ് ലോകകപ്പ് ടൂർണമെന്റുകളിൽ ഗോൾ നേടുന്ന ലോകത്തിലെ ആദ്യ താരം എന്ന സുവർണ്ണ ചരിത്ര നേട്ടവും റൊണാൾഡോ സ്വന്തം പേരിൽ കുറിച്ചു.
മറ്റു മത്സരങ്ങളിൽ ഗ്രൂപ്പ് എല്ലിലെ കരുത്തരായ ഇംഗ്ലണ്ടിനെ ഘാന ഗോൾരഹിത സമനിലയിൽ തളച്ചു. ഗ്രൂപ്പിലെ മറ്റൊരു പോരാട്ടത്തിൽ പാനമയെ എതിരില്ലാത്ത ഒരു ഗോളിന് ക്രൊയേഷ്യ പരാജയപ്പെടുത്തി. ലോകകപ്പിൽ ഇന്ന് രാത്രി 12.30ന് നടക്കുന്ന ഗ്രൂപ്പ് ബി മത്സരങ്ങളിൽ കാനഡ സ്വിറ്റ്സർലൻഡിനെയും, ഖത്തർ ബോസ്നിയയെയും നേരിടും. ഗ്രൂപ്പ് സിയിൽ നാളെ പുലർച്ചെ 3.30ന് നടക്കുന്ന ആവേശപ്പോരാട്ടത്തിൽ ബ്രസീൽ സ്കോട്ട്ലൻഡിന് എതിരെ കളത്തിലിറങ്ങും.
