വെനസ്വേലയെ തകർത്ത ഇരട്ട ഭൂചലനങ്ങൾക്ക് ദിവസങ്ങൾക്കുശേഷം രാജ്യത്ത് വീണ്ടും ശക്തമായ തുടർചലനം അനുഭവപ്പെട്ടു. യുഎസ് ജിയോളജിക്കൽ സർവേയുടെ (USGS) കണക്കുപ്രകാരം റിക്ടർ സ്കെയിലിൽ 4.6 തീവ്രതയും, കൊളംബിയ ജിയോളജിക്കൽ സർവേയുടെ കണക്കുപ്രകാരം 5.1 തീവ്രതയുമാണ് ഭൂചലനത്തിന് രേഖപ്പെടുത്തിയത്.
തലസ്ഥാനമായ കാരക്കാസിലും ലാ ഗ്വായറ സംസ്ഥാനത്തും ശക്തമായ പ്രകമ്പനം അനുഭവപ്പെട്ടതോടെ ഭീതിയിലായ ജനങ്ങൾ വീടുകളിൽനിന്ന് പുറത്തേക്ക് ഓടി. ഇതുവരെ ആളപായമോ പുതിയ നാശനഷ്ടങ്ങളോ റിപ്പോർട്ട് ചെയ്തിട്ടില്ലെന്ന് അധികൃതർ അറിയിച്ചു.
കഴിഞ്ഞ ബുധനാഴ്ച ഉണ്ടായ ഇരട്ട ഭൂചലനത്തിൽ വെനസ്വേലയിൽ ഇതുവരെ 1,450 പേർ മരിച്ചതായി ഔദ്യോഗിക കണക്കുകൾ വ്യക്തമാക്കുന്നു. 50,000-ത്തിലധികം പേരെ കാണാതായിട്ടുണ്ട്. രക്ഷാപ്രവർത്തനം തുടരുന്നതിനിടെ ഭൂചലനമുണ്ടായി 106 മണിക്കൂറുകൾക്ക് ശേഷം 21-കാരനെ ജീവനോടെ അവശിഷ്ടങ്ങൾക്കിടയിൽ നിന്ന് രക്ഷപ്പെടുത്തിയിരുന്നു.
