അർലിംഗ്ടൺ: 2026 ഫിഫ ലോകകപ്പിന്റെ റൗണ്ട് ഓഫ് 32 പോരാട്ടത്തിൽ ഓസ്ട്രേലിയയെ പെനാൽറ്റി ഷൂട്ടൗട്ടിൽ 4-2ന് കീഴടക്കി ഈജിപ്ത് പ്രീക്വാർട്ടറിലേക്ക് മുന്നേറി. നിശ്ചിത സമയവും അധികസമയവും അവസാനിക്കുമ്പോൾ ഇരു ടീമുകളും 1-1ന് സമനില പാലിച്ചതിനെ തുടർന്നാണ് മത്സരം ഷൂട്ടൗട്ടിലേക്ക് നീണ്ടത്.
മത്സരത്തിന്റെ 13-ാം മിനിറ്റിൽ എമാം അഷൂറിന്റെ ഗോളിൽ ഈജിപ്ത് ലീഡ് നേടി. രണ്ടാം പകുതിയിൽ മുഹമ്മദ് ഹാനിയുടെ സെൽഫ് ഗോളിലൂടെ ഓസ്ട്രേലിയ സമനില പിടിച്ചു. തുടർന്ന് അധികസമയത്തിലും വിജയഗോൾ പിറക്കാത്തതോടെ പെനാൽറ്റി ഷൂട്ടൗട്ട് വേണ്ടിവന്നു.
ഷൂട്ടൗട്ടിൽ ഈജിപ്ത് നാല് കിക്കുകളും ലക്ഷ്യത്തിലെത്തിച്ചപ്പോൾ ഓസ്ട്രേലിയയുടെ ഹാരി സൂട്ടാറും ലൂക്കാസ് ഹെറിങ്ടണും കിക്കുകൾ പാഴാക്കി. ഇതോടെ ലോകകപ്പ് നോക്കൗട്ട് ഘട്ടത്തിൽ ഈജിപ്തിന്റെ ചരിത്രത്തിലെ ആദ്യ വിജയമാണ് പിറന്നത്. പ്രീക്വാർട്ടറിൽ നിലവിലെ ചാമ്പ്യൻമാരായ അർജന്റീനയെയാണ് ഈജിപ്ത് നേരിടുക.
