ടെഹ്റാൻ:ഇറാനിലെ 80-ലധികം ലക്ഷ്യസ്ഥാനങ്ങളിൽ അമേരിക്കൻ സൈന്യം പുതിയ വ്യോമാക്രമണം നടത്തി. ഹോർമുസ് കടലിടുക്കിന് സമീപം വാണിജ്യ കപ്പലുകൾക്ക് നേരെയുണ്ടായ ആക്രമണങ്ങൾക്ക് മറുപടിയായാണ് നടപടി സ്വീകരിച്ചതെന്ന് അമേരിക്കൻ സെൻട്രൽ കമാൻഡ് അറിയിച്ചു.
വ്യോമപ്രതിരോധ സംവിധാനങ്ങൾ, കമാൻഡ് ആൻഡ് കൺട്രോൾ കേന്ദ്രങ്ങൾ, തീരദേശ റഡാർ സംവിധാനങ്ങൾ, കപ്പൽവിരുദ്ധ മിസൈൽ കേന്ദ്രങ്ങൾ, കൂടാതെ ഇസ്ലാമിക് റെവല്യൂഷണറി ഗാർഡ് കോർപ്സിന്റെ (IRGC) 60-ലധികം ബോട്ടുകൾ എന്നിവയാണ് ആക്രമണത്തിൽ ലക്ഷ്യമിട്ടതെന്ന് അമേരിക്ക അറിയിച്ചു. അന്താരാഷ്ട്ര കപ്പൽഗതാഗതത്തിന് ഭീഷണിയാകുന്ന ഇറാന്റെ സൈനികശേഷി ദുർബലപ്പെടുത്തുകയാണ് നടപടിയുടെ ലക്ഷ്യമെന്നും യു.എസ്. വ്യക്തമാക്കി.
അതേസമയം, അമേരിക്കയുടെ നടപടി തുറന്ന ആക്രമണമാണെന്ന് ആരോപിച്ച ഇറാൻ ശക്തമായ തിരിച്ചടി നൽകുമെന്ന് മുന്നറിയിപ്പ് നൽകി. മേഖലയിലെ സംഘർഷം വീണ്ടും രൂക്ഷമാകുന്ന സാഹചര്യത്തിൽ അന്താരാഷ്ട്ര തലത്തിൽ ആശങ്ക ഉയർന്നിട്ടുണ്ട്. ആക്രമണത്തെ തുടർന്ന് ആഗോള ക്രൂഡ് ഓയിൽ വിലയും ഉയർന്നു.
