മെൽബൺ: അയൽരാജ്യമായ ന്യൂസിലൻഡിൽ നിന്നുള്ള പൗരന്മാർക്ക് ഓസ്ട്രേലിയയിലേക്ക് നടത്തുന്ന സൗജന്യ കുടിയേറ്റത്തിന് പുതിയ നിയന്ത്രണങ്ങൾ ഏർപ്പെടുത്തണമെന്ന് ആവശ്യപ്പെട്ട് വൺ നേഷൻ (One Nation) പാർട്ടി നേതാവ് പോളിൻ ഹാൻസൻ. സമീപകാലത്തെ രാഷ്ട്രീയ സർവേകളിൽ വൻ ജനപ്രീതി നേടിക്കൊണ്ടിരിക്കുന്ന നേതാവാണ് പോളിൻ ഹാൻസൻ. ഓസ്ട്രേലിയ നിലവിൽ നേരിടുന്ന കടുത്ത ഭവന പ്രതിസന്ധിയും ജീവിതച്ചെലവ് വർദ്ധനവും പരിഹരിക്കാൻ മൊത്തം കുടിയേറ്റക്കാരുടെ എണ്ണം പ്രതിവർഷം 1,30,000 ആയി പരിമിതപ്പെടുത്തണമെന്നാണ് ഹാൻസന്റെ നയം. ഇതിന്റെ ഭാഗമായി നിലവിലുള്ള ഓസ്ട്രേലിയ-ന്യൂസിലൻഡ് കുടിയേറ്റ നിയമങ്ങളിലും മാറ്റം വരുത്തണമെന്ന് അവർ ആവശ്യപ്പെടുന്നു.
സമീപകാലത്തെ അഭിപ്രായ സർവേകളിൽ നിലവിലെ ഓസ്ട്രേലിയൻ പ്രധാനമന്ത്രി ആന്റണി അൽബനീസിനെക്കാൾ ജനപ്രീതിയിൽ ഹാൻസൻ മുന്നിലെത്തിയിട്ടുണ്ട്. വൺ നേഷൻ പാർട്ടിക്ക് 31 ശതമാനത്തോളം പിന്തുണയാണ് സർവേകൾ പ്രവചിക്കുന്നത്. ഓസ്ട്രേലിയ ഒരു ‘ഏകസംസ്കാര രാജ്യമായി’ (Monocultural Nation) മാറണമെന്നും കടുത്ത ഇമിഗ്രേഷൻ നിയന്ത്രണങ്ങൾ കൊണ്ടുവരണമെന്നുമാണ് ഹാൻസൻ വാദിക്കുന്നത്.
ഓസ്ട്രേലിയൻ പ്രതിപക്ഷ കക്ഷിയായ ലിബറൽ പാർട്ടി പോലും ഹാൻസന്റെ ജനപ്രീതിയെ ഭയന്ന് തങ്ങളുടെ ഇമിഗ്രേഷൻ നയങ്ങൾ കർശനമാക്കാൻ നിർബന്ധിതരായിരിക്കുകയാണ്. വരാനിരിക്കുന്ന പൊതുതിരഞ്ഞെടുപ്പിൽ പോളിൻ ഹാൻസന്റെ ഈ കടുത്ത നിലപാടുകൾ ന്യൂസിലൻഡ് പൗരന്മാരുടെ ഓസ്ട്രേലിയൻ കുടിയേറ്റ സാധ്യതകളെ ബാധിച്ചേക്കുമെന്ന ആശങ്ക ഇതോടെ ശക്തമായിട്ടുണ്ട്
