ഹൈദരാബാദ്: ആറര വയസ്സുള്ള കൊച്ചുമകളെ പൊതുനിരത്തിലൂടെ കാർ ഓടിക്കാൻ അനുവദിച്ച തെലങ്കാന പോലീസിലെ സബ് ഇൻസ്പെക്ടർക്കെതിരെ കേസ് രജിസ്റ്റർ ചെയ്തു. സംഭവത്തിന്റെ ദൃശ്യം സമൂഹമാധ്യമങ്ങളിൽ വ്യാപകമായി പ്രചരിച്ചതിനെ തുടർന്നാണ് നടപടി.
ഗന്ധംഗുഡ–ബൈരാഗിഗുഡ റോഡിൽ നടന്ന സംഭവത്തിൽ, പ്രായപൂർത്തിയാകാത്ത കുട്ടിയെ വാഹനം ഓടിക്കാൻ അനുവദിച്ചതിനും അപകടകരമായ രീതിയിൽ വാഹനം ഓടിച്ചതിനുമായി ഭാരതീയ ന്യായ സംഹിതയിലെയും മോട്ടോർ വാഹന നിയമത്തിലെയും വകുപ്പുകൾ പ്രകാരമാണ് നർസിംഗി പോലീസ് കേസ് എടുത്തത്.
സംഭവത്തെ തുടർന്ന് തെലങ്കാന പൊലീസ് ഡയറക്ടർ ജനറൽ എസ്ഐയെ സസ്പെൻഡ് ചെയ്യുകയും വകുപ്പുതല അന്വേഷണത്തിനും ഉത്തരവിടുകയും ചെയ്തു. സംഭവത്തിൽ കൂടുതൽ അന്വേഷണം പുരോഗമിക്കുകയാണെന്ന് പൊലീസ് അറിയിച്ചു.
