കരുനാഗപ്പള്ളി: ഖാദി വസ്ത്രങ്ങളുടെ വിൽപ്പന പ്രോത്സാഹിപ്പിക്കുന്നതിനും മേഖലയിലെ തൊഴിലാളികളുടെ ക്ഷേമത്തിനും കൂടുതൽ പദ്ധതികൾ ആസൂത്രണം ചെയ്യുമെന്ന് വനിതാ-ശിശുവികസന, തൊഴിൽ വകുപ്പ് മന്ത്രി ബിന്ദു കൃഷ്ണ അറിയിച്ചു. കരുനാഗപ്പള്ളി മുനിസിപ്പൽ സമുച്ചയ അങ്കണത്തിൽ നടന്ന ഓണം ഖാദി മേളയുടെ ജില്ലാതല ഉദ്ഘാടനവും കരുനാഗപ്പള്ളി ഖാദി ഗ്രാമ സൗഭാഗ്യയുടെ ഉദ്ഘാടനവും നിർവഹിച്ചു സംസാരിക്കുകയായിരുന്നു മന്ത്രി.
ഖാദി വസ്ത്രങ്ങൾ ദേശീയതയുടെ പ്രതീകമാണെന്നും സർക്കാർ സ്ഥാപനങ്ങളിൽ ഇവയുടെ പ്രചാരം വർധിപ്പിക്കുന്നതിനുള്ള പദ്ധതികൾ പരിഗണനയിലുണ്ടെന്നും മന്ത്രി പറഞ്ഞു. തൊഴിലാളികൾക്ക് ഓണത്തിന് മുന്നോടിയായി വരുമാന പിന്തുണ പദ്ധതികളും ഇൻസെന്റീവ് വിതരണവും നടപ്പാക്കി വരികയാണെന്നും മന്ത്രി വ്യക്തമാക്കി.
ചടങ്ങിൽ സി. ആർ. മഹേഷ് എം.എൽ.എ. അധ്യക്ഷത വഹിച്ചു. ആദ്യവിൽപന കരുനാഗപ്പള്ളി നഗരസഭാ ചെയർമാൻ പി. സോമരാജൻ നിർവഹിച്ചപ്പോൾ, സമ്മാന കൂപ്പണുകളുടെ വിതരണോദ്ഘാടനം വൈസ് ചെയർപേഴ്സൺ ബീന ജോൺസൺ നിർവഹിച്ചു. ഖാദി ഗ്രാമ വ്യവസായ ബോർഡ് മുൻ വൈസ് ചെയർപേഴ്സൺ കെ.സി. രാജൻ മുഖ്യാതിഥിയായി പങ്കെടുത്തു.
സ്ഥിരം സമിതി അധ്യക്ഷന്മാരായ ബി. മോഹൻദാസ്, മുനമ്പത്ത് ഗഫൂർ, പി. രാജു, എം. ശോഭന, ആശാ അനിൽ, വാർഡ് കൗൺസിലർ ജി. രാജേഷ്, നഗരസഭാ സെക്രട്ടറി വി.എസ്. സന്ദീപ്കുമാർ, ഖാദി ബോർഡ് ഉദ്യോഗസ്ഥർ തുടങ്ങിയവർ ചടങ്ങിൽ സംബന്ധിച്ചു.
