തിരുവനന്തപുരം: മുതലപ്പൊഴിയിൽ വള്ളം അപകടത്തിൽപ്പെട്ട് കാണാതായവർക്കായുള്ള തെരച്ചിൽ ശക്തമാക്കണമെന്ന് ആവശ്യപ്പെട്ട് മത്സ്യത്തൊഴിലാളികളും നാട്ടുകാരും പ്രതിഷേധം തുടരുന്നു. ദുരന്തത്തിൽ കാണാതായവരെ കണ്ടെത്താനുള്ള നടപടികൾ വേഗത്തിലാക്കണമെന്നാണ് പ്രതിഷേധക്കാരുടെ ആവശ്യം.
തെരച്ചിൽ കൂടുതൽ വ്യാപിപ്പിക്കുന്നതിനായി ഹെലികോപ്റ്ററിന്റെ സേവനം കൂടി വിന്യസിക്കാൻ തീരുമാനിച്ചതായി അധികൃതർ അറിയിച്ചു. നിലവിൽ കോസ്റ്റ് ഗാർഡ്, മറൈൻ എൻഫോഴ്സ്മെന്റ്, മത്സ്യത്തൊഴിലാളികൾ എന്നിവരുടെ നേതൃത്വത്തിൽ കടലിലും തീരപ്രദേശങ്ങളിലും തിരച്ചിൽ തുടരുകയാണ്.
മുതലപ്പൊഴി ഹാർബറിലെ സുരക്ഷാ പ്രശ്നങ്ങൾ പരിഹരിക്കണമെന്ന ആവശ്യവും പ്രതിഷേധത്തിൽ ഉയർന്നു. അപകടങ്ങൾ ആവർത്തിക്കുന്ന സാഹചര്യത്തിൽ ശാശ്വത പരിഹാരം നടപ്പാക്കണമെന്ന് പ്രദേശവാസികളും മത്സ്യത്തൊഴിലാളി സംഘടനകളും ആവശ്യപ്പെട്ടു.
