ഓക്ലൻഡ്: 2023-ൽ ന്യൂസിലാൻഡിലെ ഓക്ലൻഡിലുള്ള ആൽബനിയിലെ റെസ്റ്റോറന്റുകളിൽ ഭക്ഷണം കഴിച്ചുകൊണ്ടിരുന്നവർക്ക് നേരെ കോടാലിയും ഇരുമ്പ് വടിയും ഉപയോഗിച്ച് ആക്രമണം നടത്തിയ ചൈനീസ് സ്വദേശി ഫാൻറോങ് മെങ്ങിനെ (Fanrong Meng) ന്യൂസിലാൻഡ് സർക്കാർ ചൈനയിലേക്ക് നാടുകടത്തി.
ആക്രമണം നടത്തുന്ന സമയത്ത് ഇയാൾ കടുത്ത മാനസിക രോഗത്തിനും മിഥ്യാധാരണകൾക്കും അടിമയായിരുന്നുവെന്ന് കണ്ടെത്തിയതിനെ തുടർന്ന്, വിചാരണയ്ക്ക് ശേഷം കോടതി ഇയാളെ പ്രത്യേക മാനസികാരോഗ്യ കേന്ദ്രത്തിലേക്ക് മാറ്റിപ്പാർപ്പിച്ചിരിക്കുകയായിരുന്നു. മൂന്ന് പേർക്ക് തലയോട്ടിക്ക് ഗുരുതരമായി പരിക്കേൽക്കുകയും അടിയന്തിര ശസ്ത്രക്രിയക്ക് വിധേയരാകുകയും ചെയ്ത കേസാണിത്.
തുടക്കത്തിൽ ‘പ്രത്യേക രോഗി’ (Special Patient) എന്ന പദവിയിലായിരുന്നതിനാൽ ഇയാളെ നാടുകടത്തുന്നതിന് നിയമപരമായ തടസ്സങ്ങൾ ഉണ്ടായിരുന്നു. എന്നാൽ മാനസികാരോഗ്യ ബോർഡിന്റെ പുനഃപരിശോധനയ്ക്ക് ശേഷം രോഗമുക്തി വിലയിരുത്തുകയും തുടർന്ന് മധ്യ ചൈനയിലെ ആരോഗ്യ പ്രവർത്തകർക്ക് ഇയാളെ കൈമാറുകയും ചെയ്തു. വിസ അപേക്ഷ നൽകിയ സമയത്ത് ഇയാൾ തനിക്കുള്ള മാനസിക രോഗ വിവരങ്ങൾ മറച്ചുവെച്ചിരുന്നതായി ഇമിഗ്രേഷൻ ന്യൂസിലാൻഡ് വ്യക്തമാക്കി.
