ന്യൂഡൽഹി: ഇന്ത്യയിൽ പ്രവാസജീവിതം നയിക്കുന്ന ബംഗ്ലാദേശ് മുൻ പ്രധാനമന്ത്രി ഷെയ്ഖ് ഹസീന ഈ വർഷം ഡിസംബറിൽ ബംഗ്ലാദേശിലേക്ക് മടങ്ങുമെന്ന് പ്രഖ്യാപിച്ചു. ന്യൂഡൽഹിയിൽ വിദേശ മാധ്യമപ്രവർത്തകരുടെ സംഘടന സംഘടിപ്പിച്ച പരിപാടിയിൽ വെർച്വലായി പങ്കെടുത്താണ് ഹസീന ഇക്കാര്യം അറിയിച്ചത്.
2024 ഓഗസ്റ്റിൽ വിദ്യാർഥി നേതൃത്വത്തിലുള്ള പ്രക്ഷോഭത്തെ തുടർന്ന് അധികാരം നഷ്ടമായി ഇന്ത്യയിലേക്ക് എത്തിയശേഷം ആദ്യമായാണ് ഹസീന മാധ്യമങ്ങളോട് സംസാരിക്കുന്നത്. അധികാരം തിരിച്ചുപിടിക്കാനല്ല, ബംഗ്ലാദേശിനെ വികസനത്തിന്റെയും മതേതരത്വത്തിന്റെയും പാതയിലേക്ക് തിരികെ കൊണ്ടുവരാനാണ് മടങ്ങുന്നതെന്ന് അവർ പറഞ്ഞു. തിരിച്ചെത്തിയാൽ അറസ്റ്റ് ചെയ്യപ്പെടുകയോ കൊല്ലപ്പെടുകയോ ചെയ്യാമെന്ന് അറിയാമെങ്കിലും സ്വന്തം ജനങ്ങൾക്കൊപ്പമാകാനാണ് ആഗ്രഹമെന്നും ഇന്ത്യ ബംഗ്ലാദേശിന്റെ ഉറ്റ സുഹൃത്താണെന്നും ഹസീന കൂട്ടിച്ചേർത്തു.
ഹസീനയുടെ പാർട്ടിയായ അവാമി ലീഗിന് ഏർപ്പെടുത്തിയ വിലക്ക് പിൻവലിക്കണമെന്നും രാഷ്ട്രീയ തടവുകാരെ മോചിപ്പിക്കണമെന്നും അവർ ആവശ്യപ്പെട്ടു. നിലവിലെ സാഹചര്യത്തിൽ ബംഗ്ലാദേശിന്റെ സാമ്പത്തികവും സാമൂഹികവുമായ അവസ്ഥ ഗുരുതരമാണെന്നും ഹസീന ആരോപിച്ചു.
ഓൺലൈൻ പരിപാടിയിൽ ബംഗ്ലാദേശ് ക്രിക്കറ്റ് താരം ഷക്കീബ് അൽ ഹസനും പങ്കെടുത്തു. അവാമി ലീഗിന്റെ മുൻ എംപിയായിരുന്ന ഷക്കീബ്, ഹസീന അധികാരം നഷ്ടപ്പെട്ടതിനെ തുടർന്ന് വിദേശത്താണ് കഴിയുന്നത്.
2024-ലെ വിദ്യാർഥി പ്രക്ഷോഭത്തെ തുടർന്നാണ് ഹസീനയുടെ സർക്കാർ പുറത്തായത്. തുടർന്ന് അവർ ഇന്ത്യയിൽ തുടരുകയാണ്. പ്രതിഷേധവുമായി ബന്ധപ്പെട്ട മനുഷ്യരാശിക്കെതിരായ കുറ്റകൃത്യങ്ങൾ ഉൾപ്പെടെയുള്ള കേസുകളിൽ ധാക്കയിലെ ട്രൈബ്യൂണൽ ഹസീനയ്ക്ക് അഭാവത്തിൽ വധശിക്ഷ വിധിച്ചിരുന്നു.
