ഗോസ്ഫോർഡ്: കടലിനക്കരെ പച്ചപ്പ് വിരിച്ച മലയാളി മനസ്സുകളിലേക്ക് ഗൃഹാതുരത്വത്തിന്റെ പൂക്കാലം സമ്മാനിച്ച് ഗോസ്ഫോർഡിൽ ‘മാംഗോ ഓണം 2026’ ഇന്ന് (ആഗസ്റ്റ് 29, ശനിയാഴ്ച) അരങ്ങേറുന്നു. മലയാളി അസോസിയേഷൻ ഇൻ ഗോസ്ഫോർഡിന്റെ (MANGO Australia) നേതൃത്വത്തിൽ ഒരുക്കുന്ന ഈ വർണ്ണാഭമായ സാംസ്കാരിക വസന്തത്തിന് നരാര ബാപ്റ്റിസ്റ്റ് ചർച്ചാണ് (Narara Baptist Church) വേദിയാകുന്നത്.
രാവിലെ 10 മണി മുതൽ അത്തപ്പൂക്കളത്തിന്റെ സൗന്ദര്യവും ചെണ്ടമേളത്തിന്റെ താളപ്പെരുക്കവും നരാരയുടെ മണ്ണിൽ ഉത്സവലഹരി തീർക്കും. നാവിൻ തുമ്പിൽ കൊതിയൂറും രുചിക്കൂട്ടുകളുമായി പരമ്പരാഗത ഓണസദ്യയും, മലയാളിത്തനിമ വിളിച്ചോതുന്ന തിരുവാതിരക്കളിയും, തുഴതാളങ്ങളുടെ ഓർമ്മകളുണർത്തുന്ന വള്ളപ്പാട്ടും, മനോഹരമായ ഓണപ്പാട്ടുകളും കലാസന്ധ്യയും ആഘോഷങ്ങൾക്ക് മാറ്റുകൂട്ടും.
ആഘോഷങ്ങൾക്ക് ആവേശപ്പകിട്ടേകാൻ പ്രശസ്ത പിന്നണി ഗായിക അമൃത സുരേഷ് മുഖ്യാതിഥിയായി വേദിയിലെത്തും. വൈകുന്നേരം 3:30-ന് ആരംഭിക്കുന്ന സന്ധ്യയിൽ അവരുടെ സാന്നിധ്യം പ്രവാസി മലയാളികൾക്ക് സംഗീതത്തിന്റെ നവ്യാനുഭൂതി പകരും. ഫ്ലെക്സി ഫിനാൻഷ്യൽ സർവീസസ് പ്ലാറ്റിനം സ്പോൺസറായും ബോറോ സ്മാർട്ടർ മോർട്ട്ഗേജ് സൊല്യൂഷൻസ് സ്പോൺസറായും കൈകോർക്കുന്ന ഈ സ്നേഹസംഗമത്തിലേക്ക് പ്രവാസി കുടുംബങ്ങളെയും കലാസ്നേഹികളെയും ഹൃദയപൂർവ്വം സ്വാഗതം ചെയ്യുന്നതായി സംഘാടകർ അറിയിച്ചു.
